PARTAJAR LA LUZ.. VALORES ESPIRITUALES... Me va permeter de azer un chiko rezumen, mizmo ke no so kompetente, de kontar lo ke mos ekspliko Rav Nafi Haleva en el kal de Ortaköy.
Asender la Menora no es solo kemar las kandelas.
Para pueder alkansar, para mereser este akto, se tiene de suvir tres eskaleras:
La Tora, la orasion, la bienfezensia.
El Judio es la persona ke puede asender la luz i puede komunikar la luz, komunikar para aklarar la valor espiritual, la luz...
Lo ke simboliza es PARTAJAR LA LUZ.
EN LA PERASHA Beaaloteha:
Se ordeno a Aaron de asender la Menora i a la tribu i a los Levi’s se dio el dever de tomar posesion i okuparse de MISHKAN.
EL DIO PODEROZO mando a Moshe el kamino de segir. El puevlo devia de komportarse komo fue indikado, en espartiendose del dezierto en el monte Sinay para segir el kamino kon orden. I la populasion se kesha del MANA, EL PAN KE VIENE DE LOS SIELOS.
MOSHE desida ke el solo no podra konvenser i afalagar los keshozos ke estavan buenos i kontentes durante un anyo en los kampos del monte Sinay.
Moshe desido de tomar ayudo de 70 aedados aklarados ke fueron los ke ayudaron Moshe para la salidura del kampo.
Espero, keridos lektores, una semana buena i la LUZ para aklarar muestra komunita.
