Purim Purimlanu…

Coya DELEVİ Judeo-Espanyol
20 Mart 2019 Çarşamba

Oy, vamos azer un chiko moabet sovre Purim. Esta fyesta muestra, los estranjeros la konosen komo “Fyesta d’Ester”.  Me plaziya sintir la estorya de Ester ke me kontava mi avuelo, i se la aziya repetar.

En desparte de la sinyifikasyon istorika, para mi era el Taanit de mi madre, las dulsuryas, el rango ande mos metiyamos para bezar la mano de los grandes i tomar el (purimlik). No es ke era koza grande ma era importante para mozotros, los chikos. No mos abastava tanta aande Belifante para  merkar mavlachas blankas i koroladas. Ke diyas eran!

Me parese aver sintido anyos antes, ke en los djudios konservativos, las damas de nombre Ester i los sinyores yamandosen Mordehay azen Taanit el 13 de Adar. Me akodro, en mi chikes syempre fue esto un sujeto de “polemika”. Mi Mama (de b.m) aziya taanit el 13 Adar, en komemorasyon del akto korajozo d’Ester para salvar sus korrelijyonaryos.

Bueno, mi madre se yamava Miriam i las vizinas demandavan porke aziya taanit. Eya uzava a dizir: “El taanit de Purim no es solo para los ke se yaman Ester o Mordehay.” Fue ansi ke empesi ayunar, a 9-10 anyos.

Otruna karakteristika del Purim de mi chikes era la Megila d’Ester de mi Nono. El rulo teniya su kuti orijinal de karton. Ma mi avuela lo tapava tambien kon un “bogo” de atlas, del ashugar de mi madre, brodado kon motifes otomanos manyifikos. Aktualmente lo tengo yo i es para mi simbolo del Purim de mi chikes. En kada 14 Adar lo espando ensima la meza en rekuerdo de mis avuelos.

I los famozos platikos de Purim... Mi madre era la espesyalista, puedo dizir. El refran dize ke despues de Purim los platikos no tienen importansa. Komo kontradizir esta dicha, mi madre a kada rezin nasido o kada novya ke mos vijitavan por primera vez (no solo en Purim) les aparejeva platikos. Una ermoza rida blanka de dantela o brodada yena d’alkonfites blankos. Syempre aviya o un dukadiko, o un shadayiko d’oro entre los bonbones.

Avlimos del Taanit, de la Megila, de dulsuryas, platikos, biskochos, folares i mavlachas. Aki kero relatar otruna vez las palavras de la Sra. L. Koppelman. Esta afirmando ke la istorya de Purim ke konosemos todos, puede ser un gia para los ke biven en la “Diaspora”.

L.K. dize “El livro d’Ester esta ensenyando klaramente ke para pueder avansar en la vida profesyonal o politika, no tenemos el ovligo d’abandonar muestra identidad Djudia. Puedemos kedar un buen djudio, un kreente fervente, todo en syendo “reelmente” un sujeto “LEAL” a la tyerra ande eskojimos de bivir.”

Keridos lektores, syempre en mis rekuerdos nombro mi Nono (de b.m.) ke me ayudo muncho a konoser muestra Fey, muestros doveres, mitzvot i diversas ovligasyones. Ke bueno seriya si los paryentes ambezan a los chikos estas nosyones, la razon de selebrar muestras fyestas i sus istorias ets.

Munchas kozas trokaron. Mizmo si no es una jeneralidad, no esto vyendo el Purim de mi chikez. I yo tengo faltas. No reushi kompletamente a kontinuar la tradisyon de mi madre, konsiderando el derredor aktual, vezindado i otros elementos. Klaro ke lo fyestamos kon los ijos, los inyetos. Portanto, tengo syempre el sentimiento ke manka una koza ke no puedo definir. Una NOSTALJIYA? Puede ser...

 

Siz de yorumunuzu yapın

Tüm Yorumları Görün