El Dia Maraviyozo Internasyonal El Ladino/Judeo-Espanyol

Şeli GAON Judeo-Espanyol
13 Şubat 2019 Çarşamba

El 10.02.2019, Alhad demanyana, kaji 400 personas se aunaron en el salon de la eskola “Ulus Musevi Lisesi” la sola eskola djudiya ke egziste en Estambol, en el oditoryum por fyestar ‘El Dia Internasyonal del Ladino/Judeo-Espanyol’ ke se realizo por la sejena vez en Estambol.

A las onze i medya de la demanyana, entrimos al salon, duzudeado kon una shena djusto en frente kon una meza larga i tres siyas, i un pupitro kon un mikrofon a la syedra, i todos saludandosen i avlando uno kon otro. Una atmosfera kayente entre todos. Me izo grande plazer de ver esta unyon, esta solidarita de muestra komunita. Byen entendido ke estava del empisijo fina la fin el Shefe de Kultura del Cervantes, Miguel Grajales i unos kuantos etranjeros ke mos onoraron kon sus prezensyas.

En primero Karen Gerşon Şarhon tomo la palavra para dizir bienvenidos a todos los ke asistyeron i dar detalyos sovre el program del dia. Karen es la Direktrisa del “Sentro Sefaradi” de Estambol, tyene unas ideas maraviyozas, unos proyektos ke keren realizar kon Silvyo Ovadya i todos los enamorozos de la lingua djudeo-espanyol.

Despues Silvyo Ovadya, ke es el pilar de la komunita en munchos puntos de vista i lo mas sovre la kontinuasyon de la Kultura djudeo-espanyol, mos rezumo este dia del Ladino ke se fyesta en paises diferentes i la emportansa de pueder kontinuar a arrebivir esta lingua presyoza. El esforso ke estamos azyendo kon unos kuantos mansevos i mansevas para ke se ambezen i ke mos ayuden en los proyektos.

Karen ke estava prezentando a los ke van a avlar, en primero envito a François Azar ke vino de la Fransya. El es el lider del djudaismo de la Fransya i de la asosyasyon de “Aki Estamos”. Muy perseverente i salvador de la lingua presyoza ke tenemos. El avlo sovre lo ke estan azyendo por la lingua, los livros ke eskrivyo i unas kuantas istoryas de Djoha, unos kuentos ke izo riir a los partisipantes.

Suzet Herman, Şeli Gaon i Anna Eskenazi izyeron una parodiya muy sempatika i yeno de umor. “Suzet” ke es la star de syempre, konto las melizinas ke su nona aziya i sanava las personas sin kuras. Kon su boz dulse, dominando el salon entero, kon su savrozor gano los korasones de la odyensa.

Şeli Gaon imito a una profesora de dieta ke se yama “Canan Kavayikopreto”. Solo mizmo el nombre plazyo muncho a los partisipantes. Una doktora ke estava dizyendo todo el kontraryo de lo ke savemos. Por egzempyo ke los guevos no azen kolesterol i ke kale komer sinko guevos al dia. Este modo de egzempyos kon unos nombres diferentes komikes.

A la fin Anna Eskenazi, la mujer savroza i sangruda, estava kontraryando la profesora en todo modo de koza ke estava avlando. La profesora dizyendo ke no kale komer sal, asukar, arina i pan; Anna kon su savrozor dizyendo ke komer un komato de garato, unas borekitas de muez, bever vino i sumo de trushi da a la persona la gana de bivir kon felisita.

La parodiya de Selin i Can, los dos mansevos avlantes del djudeo-espanyol, estava koza de ver. Mis felisitasyones de aryento mi korason a los dos endjuntos.

A midi las komidas sefarades plazyeron a todos. Despues de komer el teatro dirijado por el mansevo Ferit Koen, eskrito por la grande artista Forti Barokas estava de pishar de la riza i muy byen djugado por todos. Grandes felisitasyones. Bravo a todos, ke en muy kurto tyempo metyeron a la shena un djugo, un trezoro. 13 artistos ke estavan uno mas mijor de otro, una maraviya… Mas i mas la profesora “Forti Barokas” kon su djugo ekstraordinaryo estava una Star.                                    

A la fin el konserto reushido de una ora de Cenk Rofe kon Karen Şarhon i İzzet Bana metyo una savor diferente al final. Cenk Rofe kanto todas las kantikas en espanyol kon muncho ardor i amista.

Remersyamos a los organizatores de este dia muy reushido; Silvyo Ovadya i Karen Şarhon i todos los ke lavoraron de alma i korason. El Dyo ke mos ayege al anyo 2020 kon sanedad i kon todos djustos de mijor a mijor….

 

 

 

Siz de yorumunuzu yapın

Tüm Yorumları Görün