Kada edad tiene su partikolaridad

Coya DELEVİ Judeo-Espanyol
12 Aralık 2018 Çarşamba

No es primera vez ke toko a este sujeto. Tengo meldado un artikolo dizyendo ke, la razon de la mas grande destruksyon del benadam, son los anyos ke pasan, en kurto, la “Edad”. Es un punto de vista ke respekto i no penso komentar. Naturalmente ke, en el korso de los anyos mos estamos desvelopando seya fizikamente, seya mentalmente, ganando konosensyas importantes i eksperyensas. Ma, en la paralela, el tyempo avagar, avagar esta azyendo su lavoro de destruksyon sovre el organizmo. I malorozamente munchas vezes sovre las fonksyones del meoyo. Es una realidad ke no puedemos trokar. Portanto, puedemos azer esforsos para konservar en syertas maneras, la sanedad fizika i mentala.

Envejeser, entrar en anyos, bivirlos ma komo? Travarmos a un kanton kon el preteksto “ya paso de mi, a esta edad kualo puedo azer?”  Este preteksto yo no lo acheto de una persona en buena salud, komo razon de ser inaktivo! Afilu un “hobby” es el bienvenido en los anyos de retreta. Komo lo remarkariash keridos amigos, no dishe anyos de vejes, ma de retreta. Porke yo penso ke seya la manseves, seya la vejes, son nosyones relativas.

Son nosyones ke se pueden komentar de diversas maneras. Ay mansevos de 45-50 anyos ke se syenten aedados. Por kontra, ay otros ke kontinuan a ser aktivos de una manera o otra, mizmo a la edad de 70-80. Estos anyos dalkavo, tuve la shans i la onor de konoser talas personas.

Kualo es manseves? Ande ampesa la vejes? Asigun mi, no egziste una baryera fizika para pueder apartar una de la otra. Es la mentalidad de la persona ke djuga rolo. Naturalmente ay i el estado de salud. Komo lo dishe mas antes, la salud es un elemento importante. Lo esto deshando afuera de muestra “diskusyon”. La persona keda manseva en la mezura de sus aspirasyones, su perseverensya, su koraje i dezeo de kompletar sus proyektos. Esta teza miya no tiene dingun raporto kon la edad. En kurto, keridos amigos, del momento ke la persona ampeso a konsiderarse komo aedado, a no tener dingun buto en la vida, efektivamente es AEDADO! Es por esta razon, ke esto perkurando a no azer este yerro.

 De vez en kuando eskrivo sovre el tema ke estamos tratando. Eskrivi munchos tekstos. Ya se muy bien, ke syempre eskrivi kozas pozitivas sovre la edad o sovre la vida, regalo valutozo ke mos izo el “Todo Poderozo”. Komo disho el eskrivano André Malraux en su paradokso: “La Vida no tiene dinguna valor, ma i nada es mas presyozo ke la Vida…”.

Tuve munchas okazyones de abordar en mis tekstos la konsepsyon de ser “aedados”. Por egzempyo, me akodro aver eskrito sovre la reushita de muestra regretada amiga Dr. Beki Bardavid z”l, reushita ke no fue sorpreza para mi. Ma, algunos fueron enkantados al grado de demandar, komo a su edad, Beki topo la enerjiya i veluntad de estudyar. Komo lo savesh, se tratava de su “Teza de Doktorado” ke fue akseptada. Esto kontinuando a pensar ke no ay edad para ampesar un lavoro i kompletarlo kon sukseso.

Kero terminar kon una dicha de Neyzen Tevfik sovre la vida. Una dicha bastante sinyifikativa: “La vida asemeja a la agua aryento de una kupa chatladeada. La agua se eskapa si beves i si no beves. Por modo de esto, mira tu de tomar plazer de la vida. Porke, ansi ke ansi, eya se va terminar…”.

P.S. Neyzen Tevfik, kon su nombre, Tevfik Kolaylı (24 Marso 1879 - 28 Enero 1953) Poeta Turko. Konosido por su manera de vida mas o menos en desdenyo de las reglas elementaryas de la komunidad.

P.S.: 4-12-2018, oy entri a mi mueva edad.

 

Siz de yorumunuzu yapın

Tüm Yorumları Görün