Israel va selebrar sus setenta anyos de independensia este anyo. La ministra de Kultura, Miri Regev, ekspliko unos kuantos de los planes por los eventos ke van a tener lugar en el aniversario.
“La seremonia del Diya de la Independensia va empesar el mierkoles i va eskapar la noche de Shabbat. La fiesta va kontinuar setenta oras kon diferentes eventos i alegriya, i va reunir todos los sivdadinos del pais entero” disho Regev en una konferensia de presa ande eya izo konoser el logotipo ofisial del setenten aniversario de la nasion. El slogan del diya va ser “La erensia de la innovasion”.
Regev disho ke la seremonia anual del estado en Mount Herzl, el 18 de avril, va ser akompanyada kon una kantika ofisial para selebrar el setenten anyo de Israel. Duspues de la seremonia va aver una egzibision de fuegos artifisiales ke va ser la mas grande egzibision en la istoria del pais.
Duspues de esto, va aver una fiesta en la plaj ke va kontinuar toda la noche. La fiesta se va ekspandir setenta kilometros, de “Tiberia fin a Eilat”.
El 19 de avril, va aver un “un espektakulo de luz” en la onor de la innovasion israeliana. La International Bible Quiz anual, i la seremonia del Premio Israel, van a ser entre los otros eventos.
El viernes, el 20 de avril, va aver fiestas kon bayles de hora en las kalejas del pais entero. Estos bayles van a ser por la memoria de los bayles ke izieron los israelianos kuando David Ben-Gurion deklaro el establisimiento del estado en el 14 de mayo del anyo 1948. Los servisios publikos de Shabbat va tomar lugar duspues de los bayles. Los eventos ofisiales van a eskapar noche de Shabbat kon un evento muzikal.
Las novelas en la televizion estan diziendo ke el kosto de la selebrasion va kostar trenta miliones de dolares. Los gastes de la selebrasion del sesenten anyo aviya sido kuarenta i siete miliones de dolares.
Regev anonso su dezeyo de rekuperar (geri getirmek) la parada (geçit töreni) militar anual de las Fuersas de Defensa de Israel, ke fueron los eventos santrales de las selebrasiones de los primeros aniversarios de la independensia de la nasion. Regev disho ke avlo sovre su dezeo kon el ministro de Defensa, Avigdor Liberman.
Duspues del anyo 1968, la parada militar no tomo lugar kada anyo porke estava kostando muncho. Duspues de akel anyo, solo en el vente i sinken aniversario, uvo una parada militar.
