Mırar I No Azer Nada!

Dora NİYEGO Judeo-Espanyol
25 Ekim 2017 Çarşamba

Munchos no konosen la istoria de los sukuenta mil judios ke los bulgares salvaron durante el Olokosto. Michael Bar-Zohar, en su livro “Beyond Hitler’s Grasp”, esta diziendo ke por munchos anyos, el rejim komunisto de Bulgaria no kijo ke esta istoria se oyga por modo ke Bulgaria era un aliado de Hitler. Hitler aviya permetido a Bulgaria de ayudarles para rekuperar sus teritorios.

La deportasion de los 11.000 judios de Trasia i Makedonia prevenio (uyarmak) Bulgaria sovre lo ke estava viniendo detras. En el marzo del anyo 1943, los trenes vinieron a Bulgaria para transportar todos los judios a un kampo de eksterminasion en Treblinka.

Demanyana, los polises empesaron a reunar los judos en las guertas de las eskolas para asperar la ora de la deportasion. Situayenes bulgaros i miembros del parlamento no desharon ke los judios seygan deportados. La Eglizia Ortodoksa Bulgara djugo un rolo emportante en la salvasion de los judios. El dia de la deportasion, el Bishop Bulgaro Kiril vino a la estasion del treno, i embiyo una letra al rey de Bulgaria por ke aga todo su posivle para salvar a los judios. Entre mientes la eglesia avrio sus puertas por refujio a los judios bulgares.

Por modo de la presion de los bulgares, i la persistensia (sabır) del Bishop, el rey anulo (iptal etmek) la deportasion, i desho ke los trenes se vaygan vazios a Treblinka.

Ma, este akto del rey no empidio (mani olmak) Hitler de kontinuar a la deportasion de los judios. Duspues de unos kuantos mezes, Hitler de muevo le embiyo una demanda al Rey para ke embiye a Polonia, toda la populasion judia de Bulgaria. Komo repuesta, el rey Boris disho ke el pais teniya menester de los judios para ke lavoren. Por esto, formaron kampos de lavoro en Bulgaria, i embiyaron 20.000 ombres al lavoro. La repuesta del rey Boris arivo muy presto, i ansi Hitler anulo la segunda deportasion de los judios bulgaros a los kampos de la muerte.

Los bulgares guadraron la salvasiones de los judios bulgaros komo un sekreto fin a la fin del rejim komunisto 1989.  Los dokumentos ande estavan eskritos los detalyos de la salvasion estuvieron guadrados por anyos. Komo no fueron destruidos, anyos duspues, los istorianos puedieron amostrar al mundo el koraje de los situayenes bulgaros, i la entervasion de la Egliza Ortodoksa, i del Rey Boris. El prezidente israelíano Rivlin, inoguro un memorial para la salvasion de los

judios de Bulgaria por el puevlo bulgaro durante el Olokosto.

Despues ke la gerra eskapo, alrededor del 96% de la populasion judia de Bulgaria emigraron a Israel. Los dos paizes tuvieron una sempatia espesial resiproka (karşılıklı) duspues de akel dia. En un viaje a Israel, el prezidente viejo bulgaro Rosen Plevneliev disho: “İsrael es un paiz muevo ma kon una istoria vieja, Israel siempre fue atraktivo para mozotros. Bulgaria es uno de los paizes los mas viejos de Evropa, i tuvo una komunidad judia desde 1300 anyos antes.

En el Febrero del anyo 2017, el Previdente Plevneliev resivio el Premio ‘Amigos de Sion’, komo rekonosimiento a los Bulgaros ke aviyan salvado sinkuenta mil judios durante el

Olokosto, i diziendo ke Israel no sev a olvidar las vidas salvadas por Bulgaria. Mezmo teniendo tantos problemes i siendo un aliado de Hitler, Bulgaria fue korajoza i protejo toda su populasion  judia. İsrael no sev a olvidar esto, i l ova amostrar al mundo entero.