Espanya i Portugual estan onorando el Ladino

Dora NİYEGO Judeo-Espanyol
9 Ağustos 2017 Çarşamba

Mas de sinko siglos despues ke el rey Fernand i la reyna Isabel ekspulzaron la populasion judia de Espanya, ladino va ser onorado ofisialmente por la prensipal otoridad linguistika de Espanya.

La Akademia Espanyola va adjuntar la seksion judeo-espanyol, a las investigasiones (araştırma) de las 23 linguas espanyolas de la Amerika Latina i el Ekvator, en Israel.

Avlantes del judeo-espanyol, o ladino, se fuyeron de Espanya, i se enstalaron en otros lugares de Evropa, del Medio Oriente, del norte de Afrika, i de la Amerika Latina.

El direktor de La Akademia Espanyola, Dario Villanueva, esta diziendo ke el judeo-espanyol es una lingua kultural i istorika muy emportante, i ke kale dar una akademia propia a esta lingua.

“Los judios ke fueron ekspulzados en el anyo 1492, emigraron a Evropa i a las Amerikas, yevandosen kon eyos el judeo-espanyol djusto komo lo avlavan en Espanya”, disho Villanueva.

“Todo fue prezervado fin oy; la literatura, el folklor, las traduksiones de la Biblia, i periodikos eskritos en ladino”.

“Munchas palavras arkaikas en espanyol fueron prezervadas en el judeo-espanyol, i tambien enfluensaron las linguas de los paizes ande los sefaradis se enstalaron”.

Villanueva disho ke mueve akademikos ke avlan el ladino, van a ayudar para ke una akademia judeo-espanyola se enstale en Israel. “La idea no es de absorvar el ladino al espanyol moderno; la idea es prezervar esta lingua”.

Isaac Querub, prezidente de la Federasion de las Komunidades Judias de Espanya, esta kontente de esta desizion de prezervar esta lingua rika kultural.

“Es la lingua ke las madres empleyavan en las kantikas de los bebes, la lingua de las reseftas de las komidas sefaradis, la lingua ke se avlava en la entimidad de kaza” disho Querub. “ Esta es una desizion ke Espanya tomo para korijar las enjustisias de 1492, ma yo preferava ke la Akademia de Ladino se establisiera en Espanya, i no en Israel”.

Shmuel Refael, direktor del Sentro Salti de Estudios Ladinos de la Universidad Bar-Ilan en Israel, disho ke el Ladino reprezanta ‘una kultura i una identidad’ por los judios sefaradis ke bivieron en la Peninsula Iberika antes del anyo 1492. “En Israel ay alrededor de 400.000 personas ke avlan el Ladino.

Antes dos anyos, Espanya i Portugal metieron leyes para ke tornen atras los desendientes de miles de judios ke fueron ekspulzados a la fin del kinzen siglo.

El governo espanyol disho ke kere korijar el “yerro istoriko” ke izieron a la populasion judia del pais, en forsandolos a konvertirsen al katolisizmo, o matandolos en kemandolos en la ogera (şenlik ateşi).

Portugal disho ke mezmo ke es emposivle de korijar lo ke se avia echo, la oferta (teklif) de nasionalidad esta reprezantando “una propozision para ganar atras un derecho”.