Los superheros de Hollywood son lo mas Judıos

Dora NİYEGO Judeo-Espanyol
25 Temmuz 2017 Salı

Los kreadores de los superheros de Hollywood son lo mas judios. Los kreadores de los superheros, son los ijos de los emigrantes judios de la Amerika, ke fueron forsados a ser de la segunda klasa. La gerra de estos judios por la justisia, esta reflektada en los superheros.

El eskritor Jabad Simcha Weinstein, en uno de sus livros, esta kontando komo, la istoria judia, la kultura, i las valores judias, ayudaron a estos kreadores, a formar los karakteres de los superheros. La duble identidad de los karakteres del komiko, esta reflektando las dos vidas ke el judio de la diaspora bive; su vida privada komo un Judio, i su vida publika. Estos superheros estan reflektando el judaizmo en tres aspektos diferentes; istoriko, bibliko, i kultural. Eyos son lo mas estranjeros en una tierra estranjera, i son lo mas, malentendidos en la sosiedad ande biven.

Los kreadores del famozo superhero, Superman, son dos judios amerikanos, Jerry Siegal, i Joe Shuster. Siegel i Shuster krearon un personaje, ke reflekta las proprias valores judias. La istoria de Superman tiene paralelizmos kon la vida de Moshe Rabeno. Un padre salva la vida de una kreatura, metiendolo ariento de un sesto (o una kapsula espasial), i lo embiya flotando a un muevo mundo ande va bivir en la seguridad. La kreatura rankontra una famiya mueva en su muevo mundo. Superman es giado (yol göstermek) por el saverisio i los konsejos de su padre. Superman bive dos vidas kon una identidad sekreta. Komo Moshe Rabeno, Superman salva la djente de los dezastros.

Siegel i Shuster nunka deklararon ke Superman es judio, i probablamente, no tuvieron la entision de dizirlo porke en el tiempo de la segunda gerra mondial, mezmo en la Amerika, aviya grande prejuisio. En sus primeras istorias, Superman, en vezes, kitava en medio los planes sekretos de los nazis almanes. Los amerikanos no lo puedian entenderlo, ma en el anyo 1940, el ministro de propaganda de los nazis, Josef Goebbels, deklaro ke Superman es judio.

Captain America, es kreado por los judios tambien. Captain America lucha kontra los nazis. El primer numero del livro, fue publikado en el mez de marzo del anyo 1941. La primera pajina del primer numero de Captain America, ke fue publikado sesh mezes antes del atako a Pearl Harbor, esta amostrando Captain America, koriendo para atakar Hitler.

Batman, Spider-Man, The Hulk, los Kuatro Fantastikos, Ironman, los X-men, Thor, i los Vengadores son unos kuantos de los superheros kreados por judios. La Revista ‘Mad’, fondada en el anyo 1952, i ke fin oy, fue la mas famoza revista komika, fue kreada por dos judíos, el editor William Gaines i el editor Harvey Kurtzman. ‘Mad Magazine’ empleyo frazes en yidish durante munchos anyos. La primera istoria en su primer numero, era sovre dos ladrones judios. La istoria se yama “Ganefs” (ladrones en yidish).

En el anyo 1981, ‘Magento’, ke es el prensipal enemigo de los X-Men, es un karakter kon poderes supernaturales, i es un sorebiviente judio del Olokosto. ‘Batwoman’ Kathy Kane, es tambien una superhero judia ke selebra las fiestas judias.

Antes trenta anyos, Art Spiegelman, kreo “Maus”. Munchas personas lo ven komo uno de los mas reushidos karakteres, en el mundo de los komikos. En el anyo 1992, “Maus” fue el primer komik ke gano el Premio Pulitzer.

La idea de un ser de grande poder kon saviduria i justisia, fue muy atraktiva por los judios ke fueron munchas vezes viktimas del poder violante i indjusto. Los artistos judios, ke krearon los superheros, imajinaron super fuersas ke van a gerreyar kon la indjustisia i violensia.