Vayakel – Pekude

Rav Yeuda ADONİ Köşe Yazısı
7 Mart 2018 Çarşamba

En el livro Shemot, la fragua del Mishkan, el Santuvaryo okupa un lugar muy grande. Kuatro perashiyot son apropyadas para esta ovra. En los perashiyot Vayakel i Pekude vemos ke se termino la fragua del Santuvaryo i ya esta pronto por azer el estrenamyento.  La enkomendansa de guadrar el Shabat, en la perasha Ki Tisa vyene despues de la enkomendansa de la fragua de el Mishkan. En la perasha de Vayakel vemos en primero el Shabot i despues la fragua del Mishkan.

En la perasha de Ki Tisa, despues de la nominasyon de Betsalel i Aoliav, komo kapos maestros, nos enkomenda el Kriyador la grandeza de el dia de Shabat. El sinyor de Rashi eksplika dizyendo malgrado ke vash a ser okupados kon vuestros echos, el Shabat no vo lo vash a olvidar. Antes de enkomendar la enkomendansa de la fragua, estamos enkomendados de santefikar el Shabat. Ibn Ezra lo intrepeta esta verseto dizyendo: Malgrado ke semos ovligados de azer el komando de el Todo Poderozo tambien semos ovligados de no ezbivlar el dia Santo de Shabat. Komo lo develope Rabi Moshe ben Nahman sesh dias vash a lavorar en la fragua del Mishkan i no el syeten dia porke es Santo para el Kriyador. Tambien el dia de Shabat va ser Santo i para vozotros. En el livro Tora Temima dize ayegar sakrifisyos era un dover grande i spiritual en el tyempo de el Bet Amikdash i tambien se aziya korbanot en dia de Shabat. Porke razon la fragua del Mishkan no fue permetida en Shabat? La repuesta es ansi: los korbanot tyenen un tyempo fikso por ayegarsen, si paso su tyempo se puede baldar, de ayegar este sakrifisyo i se puede pasar una enkomendansa de la Tora pero, por la fragua de el Mishkan no fue taksado un tyempo.

El Talmud konta la ora ke Moshe Rabenu estava entremetido en el lavoro del Mishkan no se akonsejo kon los dirijentes del puevlo. Les desplazyo muncho a los dirijentes. Los dirijentes de el puevlo enpesaron a traer piedras presyozas ke eran menestorozas para el Mishkan.

En el livro Mishle, Shelomo Ameleh dize: Pensamyentos, kon konsejas se konfirman. Tambien en el livro Yehezkel vemos: i bushkaron vizyon del profeta, i konsejos de los viejos. De estos versetos, entendemos ke Moshe Rabenu deviya akonsejarse kon los kapos de la nasyon.

Moshe Rabenu teniya razon, el plano de el Mishkan, el Todo Poderozo se lo amostro a Moshe Rabenu. Todo ya estava pronto de parte de el Kriyador. Una koza ke esta enkomendada de parte de el Kriyador no es derecho de akonsejar de afirmarla o no.

Ma vemos en el Talmud ke el Kriyador se akonsejo kon Moshe Rabenu por la nominasyon de Betsalel. Moshe Rabenu le responde a el Kriyador: Tu si lo ves pertenesyente yo no te puedo dizir nada. La dize el Kriyador, malgrado todo va akonsejeta i kon el puevlo i demandales. El puevlo responde dizyendo, El Kriyador i tu, si lo vesh pertenesyete a Betsalel por fraguar el Mishkan, nozotros ke puedemos dizir.  

Kon dyes mandamyentos fue kriyado el mundo i ke deprendimyento? Para dizir i desyerto kon mandamyento uno puedia por ser kriyado. Salvo, por panarse de los malos ke deprendyen a el mundo ke fue kriyado kon dyes mandamyentos. I por dar presyo bueno a los djustos ke sostyenen a el mundo ke fue kriyado kon dyes mandamyentos. Este paragrafo lo meldamos en el livro Pirke Avot.

Este paragrafo ke meldamos en el sinken perek, nos enbeza ke el Kriyador por dar muncha paga a los Tsadikim, a las personas djustas, kriyo a el mundo kon dyes dichas mandamyentos ke el puedia kriyar a el mundo kon una dicha.

Porke los tsadikim, las personas djustas, sostyenen a el mundo. Komo dizen nuestros savyos, el mundo se sostyene sovre la ley i sovre el servisyo, i sovre la bienfezensya (dicha de Shimon el djusto) i Raban Shimon ben Gamliel dize: sovre el djuisyo, sovre la verdad i sovre la pas el mundo se sostyene.

El Mishkan, el santuvaryo ke enkomenda el Kriyador a Moshe Rabenu de fraguarlo mezo de Betsalel, semboliza a el mundo. Tambien el Bet Amikdash ke fraguo Shelomo Ameleh en el mundo de el djudyo. Komo dize en el Midrash, todo lo ke egziste en el mundo egziste en el Santuvaryo. Komo meldamos en le perasha de Yitro, en todo lugar onde enmeteras mi nombre, vendre a ti, i te bendizere. Sigun eksplikasyon de el Sinyor de Rashi en todo lugar onde enmentarash mi nombre, es el santuvaryo.

El santuvaryo es yamado ‘Kol amakom’, todo el lugar. I el santuvaryo es el lugar onde mora le Shehina, la divinidad. Si el mundo era en estado de el Santuvaryo, el materyalismo no podestava ni egzistiriya malisya en el mundo, i todas la personas serian djustas. Dunke devemos ser djustos i amar a la djustisya, komo dize en la Gemara de Berahot, de el diya ke se destruyo el Santuvaryo, la Tora nos mampara i devemos de estar syempre djuntos kon la Tora. Kuando egzistiya el Santuvaryo, la ara, el mizbeah onde se aziya los sakrifisyos perdonavan nuestros pekados, o el pranso ke es ordenado sigun la ley nos perdonavan nuestros pekados. Oy, el pranso ke es ordenado sigun la ley nos perdona. Dunke onde nozotros lo yamamas, kon korason kumplido, a el Kriyador el nos responde. Syempre ke nos responda para bien.