La komunidad Djudia de Estambol fue onorada estos ultimos dias, de la prerzensya de tres grandes reprezentantes de “l’Alliance İsraelite Universelle”:
Roger Cukierman: Ansyano Prezidente del CRİF, ansi ke viche prerzidente aktual de la Aliansa Israelita Universal i del World Jewish Congress.
Jean Claude Kupernic: Direktor de la prestijyoza biblioteka de la Aliansa Israelita Universal.
Ariel Danan: Viche Direktor de la mizma biblioteka.
Fue un enkontro muy fruktuozo para mozotros. Eyos mos avlaron de una de las mas prestijyozas İnstitusyones djudias, una institusyon ke tyene en su programa de lavoro no solo los problemas konsernando el djudaizmo de un payis en partikular, ma los ke son relativos al Djudaizmo universal en su totalidad.
Desde su fundasyon en 1860, la Aliansa Israelita tuvo unos kuantos objetivos de baza, entre los kualos:
a) Ovrar en favor del adelantamyento de los djudyos en ke lugar del mundo ke sea, i salvarlos de la provedad i de la inyoransa... Eya fue la primera organizasyon a krear eskolas djudias en los Balkanes, ansi ke en el Oriente Medyo i en la Afrika del Norte, afin de dar a los elevos la formasyon profesyonal nesesarya a sus salvasyon de la mizerya. De mezmo la Aliansa salvo las mujeres djudias del analfabetizmo ke era el loto de munchas de entre eyas i provoko un trokamyento radikal en la manera de bivir de las famias de la klasa sosyal medyana en dando a las ijas una edukasyon moderna, lo ke les permetyo de luchar kontra los kazamyentos antes la edad menesteroza i los prejuisyos de la epoka.
b) Asegurar una edukasyon en mizmo tyempo djudia i internasyonal a los ninyos en kreando korsos de Ebreo moderno, komo tambyen de kultura jeneral, afin de avrir orizontes muevos delantre eyos...
c) Akudir las komunidades djudias ke se topan en estado de perikolo, en intervinyendo diplomatikamente.Ansi, la Aliansa partisipo a los esforsos ke fueron organizados verso la fin del 19en siglo para ayudar los djudyos a fuir de los progromes de Rusia.
d) Desvelopar la agrikultura en la Palestina de entonses en el eskopo de aparejar refujyos para los djudyos ke fuyian del maltratamyento i de las persekusyones ke eran munchas vezes sus destino... ets...ets...
La aktividad de esta grande Institusyon es syempre enorme aktualmente, kon todas las muevas eskolas ke eya instalo en Israel, Fransa i diferentes otros payizes Evropeos ande todo en respektando estriktamente el programa de edukasyon propyo a kada payis, se esta dando una formasyon miksta djudia i moderna.
İ ke dezir de su Biblioteka, maraviyoza en su kontenido de dokumentos personales komo ofisyales de todos los tyempo, ke mos ambezan muncho sovre el pasado i sovre muestra orijen komun... Arshivos indispensavles ke arrelumbran muestro kamino verso un Futuro muncho mas klaro.
