Keridos Korelijionarios
Sigun nuestro kalandario tradisional, arivando al mez Tishri entramos a un periodo de frontarmos kon la seria de “Fiestas de Tishri” ke empesan kon el Rosh Ashana.
Agradesemos a el Todo Poderozo ke mos izo alkansar a estos diyas kon salud i paz, i rogamos ke mos ayege a munchos periodos semejantes a todos nozotros en yena prosperidad.
Ya lo savemos muy bien ke el Rosh Ashana no es solo el prensipyo de un anyo nuevo en la kalandaria sino ke, alo mas emportante de esto teine la valor de ser la okazion i el prensipyo de valorizar de nuevo nuestra vida verso los preseptos de nuestro Dyo.
En realidad siendo ke nozotros deshamos nuestro repozo korporal i tomamos
parte en las rogativas tradisionalas de Selihot, sigun mi es ke nos aparejamos moralmente a profitar de esta okazion. Lo emportante es la dansidad de nuestra voluntad ke puedemos tener en este sujeto ke i esto depende de la kapachidad de nuestra espiritualidad.
Rogo ke el Santo i Bendicho El seya en ayudo de todos nozotros en esta lucha bien dura.
Keridos Ermanos
Profitando de la okazion kero partajar kon vozotros mis pensamientos sovre siertos evenementos aktuales en nuestra komunidad, komo uzo da azerlo en mis mesajes.
Muy klaro ke nos kontentemos de ser los testigos ke nuestra eskola arivo a un nivel bien alto de reushitad. El ser ke el numero los elevos de nuestra eskola alkanso kaji ala maksimidad nos esta mostrando ke nuestra komunidad esta bien apresiando la dicha reushidad.
Si nuestros ijos armados de siensias sekulares en la eskola, se akostrumbran de ir a las sinagogas i siguen los ensenyamientos de nuestra fe i de nuestras kostumbres en Talmud Tora, esto siguro ke maz se les enfortesera sus idantidad judia i puederan entegrarsen a la sosiedad sin dingun perikolo de asimilasion. Por siguro ke i esto depende de la volundad sensera de sus parientes, i por mas bien dizir de akostumbrarsen eyos mizmos de irsen a las sinagogas.
Espero ke este punta de vista va ser tomada en konsiderasyon.
Entremientes kero apresiar i agradeser nuestras asosiasiones i organizasiones ke de diya en diya alkansan la perfeksion. Estos ultimos tienen un rolo muy emportante en nuestra kolektividad.
Keridos Korelijionarios
Seya los rabinos de nuestra komunidad i seya nuestros konsejeros i dirijentes estan dispuestos i prontos a rezolusionar todas las difikultades de nuestros individuos. La metod la mas mijor por esto es de aderesarsen direktamente a los responsavles interesados i ekspozar las problemas kon trankilidad. Ke sino, no es muy fasil de rezolusionar la problemas ke se ekspozan en ambientes adekuados.
Entre todo esto kero yamar vuestro entereso de tomar parte en todas nuestras aktividades. Por ke el progreso de nuestra komunidad depende de vuestra partisipasion.
Un otro evenemento ke mos da kontentes es nuestro Ospital Or Ahayim ke oy endiya puede rivalizar kon los mas modernos ospitales de la sivdad i ke en este ospital oy egziste seksion de ginekolojia i natalidad. Kreo ke los primeros chios de un nuevonasido va ser el maz grande respekto a la estoria de este ospital. El Or Ahayim ya lo merese este respkto kon su demaziya.
Keridos Ermanos
Todo en siendo de estos sintimientos i pensamientos, vos bendigo a todos vozotros por Rosh Ashana i las fiestas siguentes kon las bendisiones de la santa Tora i vos auguro sanedad, prosperidad, pas i todo bueno.
Tizku Leshanim Rabot
Shana Tova Umetuka
Rav İsak HALEVA
Gran Rabino
