Hélène Ségara

Esti SAUL Judeo-Espanyol
22 Şubat 2017 Çarşamba

Mos konta:

“En 2001, en la yena gloria de mi profesion muzikal, tuve ganas de meter fin. Es la Soeur Emmanuelle ke me dio el gusto de mi ofisio. La enkontri en el kanapé kolorado, en el program “Vivement Dimanche”, organizado por Michel Drucer en la TV 5.”

‘La muzika es prezente para unir’

Yo kanto en Fransez, en Arabo, en Ebreo.

La kansion de mi repertuar, “Komo Te Yamas” es muy importante.

Mi kansion avla de konfliktos de relijiones i ke los individuos no deven de gerreyar al nombre de Dio. Empesa kon un kante en Ebreo, kontinua kon las kampanas, i se termina kon “Allah-u Akber”.

En 1997 kanti “Vivo per Lei” en duo kon Andrea Bocelli, kuando me propozaron de enkarnar Esmeralda en la komedia Muzikal “Notre Dame de Paris”. Refuzi de djugar, ma sovre insistensia, despues sinyi por 3 mezes. Fue un triomfo, se prolongo por 3 anyos.

En estos anyos mi album aparese “Au Nom d’une Femme”, un disko de diamante. Un milion de diskos fueron vendidos.

Tuve anyos orozos, ma los 5 anyos de mi vida pasaron sin ke me apersiva... Sinko anyos ke bivi en un otel, leshos de los miyos. Me estava sintiendo muy sola, kada dia mas i mas.

La popularita me izo sintir kulpavle. Me demandi:

- Me aman por lo ke reprezento, o por ken so realmente: Una ija, una kampesina engrandesida por los kampesinos Italianos...

Me avia desidado de aretar i lo avia anunsiado a Annie Markhan, mi menajera.

Invitada a mi aparision publika final, enkontri a Soeur Emmanuelle (93 anyos), una mujer ekstraordinaria ke me konvensio kon su entelijensa i jenerozita. Me disho:

- Saves Hélène, no deves de arretar. Se tiene menester de personas komo ti ke distribuan amor i alegria. Solo deves de realizar ke vas a kontinuar, ma diferentemente.

Alora aprendi a responder negativamente a los projektos ke no me enteresavan.

Topi tiempo para okuparme de siertas asosiasiones. Kanto en las salas chikas, las ke prefero. Ansi profito de mi marido i de mis kreaturas, no me preokupo mas de suksesos ni de shifros.

Solamente kero ser oroza i nunka olvidarme ken so yo.”

Hélène Ségara kontinua a achileyarmos kon su boz enkantadora...