En los anyos 1950’s, en los Estados Unidos, grandes otomobiles, ustansiles elektronikos, kameras Kodak i azer weekend tures era moda. Las personas de la klase medya del payis teniyan buen estado, i lo mas se ivan a los restoranes i a los sentros de atraksyon. Muevos banliyos fueron kreados por esta djente. El sistema sosyal de estos banliyos era mas o menos el mezmo. Las madres se okupavan de los ijos i gizavan diferentes komidas, biskochos i dulsurya. Los fines de semana, se aviya kreado un prototipo de padres vistidos kon pijamas, pantuflas, reparavan fuentes rotas i todo modo de ustansiles rotos.
El fin de semana, las gazetas empesaron a dar suplementos ande metiyan karikaturas de la vida de estos prototipos. Blondie i Dagwood eran los karakteres de las karikaturas de estos prototipos. Akel tiempo, en los Estados Unidos era una misyon kultural de transferar las formas de vida del payis. Esta komika fue kreada por el artisto Chic Young.
Blondie i Dagwood, (Fatoş i Basri en muestro payis) eran marido i mujer. Dagwood Bumstead era el ijo playboy de un milyonaryo. Blondie i Dagwood se kazaron ma la famiya de Dagwood no estava dakordo kon este kazamyento i Dagwood fue dezeredado de la erensya de su padre. Blondie i Dagwood tuvieron un ijo (Aleksander), i una ija (Cookie).
En estas karikaturas, meldavamos la vida kotidyena de Fatoş i Basri. Basri teniya un patron muy furyozo. Meldavamos las desadvanturas komikas de Basri kon su patron. Kada vez era Fatoş la ke menajava las chikas u grandes krizas de la vida. Los primeros sesenta anyos de la komika, Fatoş era una mujer de kaza i una madre ke se okupava de sus ijos i de su marido. En los anyos sigientes, Fatoş uydeyo a la moda, i avriyo un echo de “catering”. Basri era una persona simpatika ke mos aziya riyir kon sus komportamyentos adorables ma lo mas ineptos. Basri era el prototipo del marido torpe, ma marido i mujer se keriyan muncho bien. Los sandviches de Basri mos aziyan riyir a todos. A medya noche, Basri se ambreyava i se iva a la kozina, avriya la frijider, i se aziya un sandvich ande metiya todo modo de koza ke topava en la frijider.
Anyos despues Dagwood (Basri) dyo su nombre al sandvich Dagwood en la Amerika. Este sandwich, ke es de 680 gramos, konsista de salami, jambon, kezo chedar, sevoya kolorada, lechuga, domat, pimyenta, mustarda, i diferentes espesias Mediteraneas.
Me akodro ke kada diya asperavamos a kuatro ojos la gazeta para meldar las estoryas de Fatoş i Basri. Aparte de esto, merkavamos livros ande meldavamos las istoryas de este kupl. Esta komika teniya mas de 250 milyones de lektores en sinkuenta i sinko payises. Oy, Basri iva tener setenta i sesh anyos si la komika kontinuava.
En mas de vente filmos, Penny Singleton djugo el rolo de Blondie (Fatoş), i Arthur Lake djugo el rolo de Dagwood (Basri). Izyeron tambien dos serias de televizyon i un filmo de televizyon ke salyo en la televizyon en 1987. Fatoş i Basri era tan populares ke sus istoryas fueron tradusidas a trenta i sinko linguas.
