Djuevez el 19 del mez koryente,  la Komunidad djudia de Estambol organizo un  pranso de “iftar”(kortadura del tanid muzulmano) al kual eran kombidados personajes de alta importansa.  Entre munchos otros, el Governador de muestra sivdad Hüseyin Avni Mutlu, el Prezidente jeneral  de la Munisipalidad  de Estambol Kadir Topbaş, el  Prezidente de la munisipalidad  de Beyoğlu Ahmet Misbah Demircan, el Müftü Prof. Mustafa Çağrıcı, el Prezidente de la seksyon CHP de muestra sivdad Berhan Şimşek, numerozos diplomates  i  numerozos notavles.

A la fin de la komida el selebre Hazan de muestra komunidad David Sevi kanto himnos relijyozos en hebreo i la ultima orasyon fue dicha por el segundo Müftü Yakup Kabalak, el kual oguro ke la espiritualidad del Profeta se poze sovre  todos.

La nochada  fue konsakrada a la unyon, la amistad  i la konsentrasyon espiritual i mistika.

Al momento de la partensya, un livro fue ofresido a kada kombidado de la parte de la gazeta Şalom.