Fidel a la tradisyon, la ermoza fyesta de Purim arrelumbro una vez mas la dulse atmosfera de  la antigua Sinagoga de Balat yena de Notavles i Myembros de muestra kolektividad.

Tres koros realsaron ainda mas la espiritualidad  mesklada de alegria de esta fyesta ke simboliza el milagro de la salvasyon del puevlo djudyo: “el de los Maftirim,” “el  de los Ninyos del Talmud Tora de Şişli” i “el de los Mansevos de la mizma asosyasyon”. A esta okazyon imposivle de no avlar de la remarkavle boz del Hazan İzzet Barokas, el kual kon sus amigos interpretaron kon sukseso las kantikas klasikas de Purim de una manera enteramente moderna.

La asistansya era nombroza, enkavesada por la prezensya del Gran Rabbino Rav İzak Haleva i tambyen Rav Benveniste ansi ke del Prezidente de muestra Komunidad Silvyo Ovadya, los kualos tomaron la palavra para ekspresar la  sinyifikasyon profunda de este dia de alegria.

El prezidente de la komunidad de Balat Albert Suryano, a su torno, manifesto su kontentes kon palavras fuertes i adekuadas.

Koronamyento de este dia de fyesta, los ninyos del Talmud Tora de Şişli meldaron la Negila de Purim.

I komo de uzo “mavlachas de Purim” i “redomikas de agua de kolonya” fueron distribuidas a la asistensya.