El Kriyador le dize a Moşe Rabenu ke salga a la gera kontra los midyanim, por kavza ke izyeron verter la sangre de los djudyos. Despues ke se apronte, ke ya vino la fin de su vida.

Moşe Rabenu a un ke entendyo ke su muerte esta dekolgada en esta gera i saviya por siguro ke no se iva murir antes de azer la gera, kon todo, no perdyo tyempo de azer una ora antes el komando de Dyos. Moşe Rabenu mando a Midyan 12 mil almas de djudyos a mil personas kada trivo, debaşo el komandanyento de Pinehas ijo de Elazar gerreyaron kon las midyanim i mataron a sus sinko reyes, i a todos los ombres i a Bilam ke estava kon eyos. Kemaron todas las sivdades. El puevlo djudyo ya estava pronto de entrar a la tyera de Kenaan los trivos de Gad i Reuven tenian munchas ovejas i kuatropeas. Se les aziya menester luguares de apasentar a sus ovejas vyendo ke los luguares ke tomaron del Emori, i de el Basan eran unas tyerras muy visyozas, los grandes personajes de estos trivos se fueron onde Moşe Rabenu i rogaron si era posivle ke les dyera estas tyerras a eyas por bivir i keno loz izyera pasar a eyos a la frontyera por la otra parte de el yarden. A Moşe Rabenu le desplaze muncho esta demanda de los trivos de Reuven Gad i medyo trivo de Menaşe i les dize: Vuestros ermanos ke vayan a gerear kon sus inimigos, i vozotros kereş estar aki en vuestro repozo?  İ les aze akodrar el pasaje de los meragelim, lo eskulkadores ke kavzaron de estar 40 anyos en el dizyerto. Los trivos ke izyeron esta demanda les prometen a Moşe Rabenu ke eyos vanana gerear allado de sus ermanos i kuando vana repozar todos sus ermanos en la tyerra prometida, vana tornar allado de sus famiyas en las tyerras ke eyos enveluntaron.

Moşe Rabenu les dize si vozotros vaja estar fideles en vuestra palavra ke prometiteş, estonses vaja tener merito, en la demanda ke tuviteş. Si azeş la kontra vaja pedrer vuestra razon.

Los trivos de Reuven, Gad i medyo trivo de Menaşe kedaron fideles en sus palavras i eredaron las tyerras ke eyos enveluntaron...