Esta semana reelmente tenemos munchos sujetos a diskutir. Ma kreo ke el mas emportante es el akordo ke se firmo entre la Turkiya i Israel dospues de sesh anyos de relasyones en un nivel muy flako. Todo empeso kon el vapor “Mavi Marmara” ke kijo ir a Gaza en el empesijo del anyo 2010. I el evenimiento el mas eksitante fue en Davos entre el primer ministro turko Erdoğan i el prezidente Israelyano Peres ke fue nomado “one minutes”. I malorozamente dospues de estos evenimientos los dos governos travaron sus ambashadores; i los dos paises fueron reprezentados por diplomates de un nivel mas basho.
Kale ke achetemos ke no mos plaze a mozotros Djudios Turkanos ke las relasyones entre la Turkiya i Israel no seyan muy serka. Porke el antisemitismo puja en el pais. I no semos orozos kon estas kondisyones; mizmo si los dirijentes del pais dizen ke no ay dingun relasyon entre los Israelyanos i los Djudios Turkanos.
La Turkiya i Israel son los paizes ande la demokrasiya egziste lo mas en los paizes del Medio-Oriyente. I estos dos paizes deven de tener buenas relasyones para la prosperidad de la rejion. Savemos ke en los anyos dalkavo se topo grande kuantidad de gaz natural en la mar serka de Israel i los Israelyanos reusheron a kitar el gaz serka de Kibris en la partida grega. Esto reelmente es muy emportante por los dos paizes. El parlamento israelyano dyo karar de vender los kuarenta por syen del gaz ke va obtener. La Turkiya merka la mas grande partida del gaz natural de la Rusia ke vende al presyo ke kere i ke le plaze krear siertos problemes ekonomikos. Israel puede vender el gaz kon un “pipe line” (buri) ke puede pasar por la Gresia ama esto no es ekonomiko i todos saven ke la Turkiya tiene menester de este gaz. Agora estan avlando para realizar un “pipe line” de 550 kilometros debasho de la mar. I si keren van a vender a la Turkiya i si keren van a vender a los paizes Evropeos. Ma kale saver ke esto se puede realizar en las anyos 2020. Bivir i ver.
Ya savemos ke dospues de los problemes ke bivimos kon los Rusos, el Prezidente Putin dyo orden ke los Rusos ne se vayan a la Turkiya para turizmo i esto dyo reelmente un grande danyo al turizmo Turko i al turizmo de Antalya ke era muy famozo en Israel. No savemos si los Israelyanos van a trokar de itinerario i van a empesar a vinir a Turkiya ma kreo ke esto se va realizar en unos kuantos mezes porke las kompanyias turistikas turkas keren todo modo de turistos i tenian buenas relasyones kon los Israelyanos.
De punto ekonomiko no tuvimos una amengura en el importo i el eksporto entre los dos paizes durante estos sesh anyos. Ma kreo ke vamos a bivir un enaltesimiento en el komerso internasyonal entre los dos paizes. Mizmo los palestinianos van a ser enfluentes en este enaltesimiento.
Oy reelmente esto kontente de ver este akordo entre los dos paizes i espero ke estos dos paizes van a tener buenas relasyones no solo de punto de vista ekonomiko ma tambien turistiko de las dos vandas, kultural, akademiko, artistiko…
Nota: Kero rengrasyar al sinyor Rifat Bali por su frankeza i malgrado ke no aviya sitado el nombre de la firma (müessese) de publikasyon kijo dar detalyos sovre su politika de publikasyon.
