En el livro Shemot la fragua del Mishkan el santuvaryo okupa un luguar muy grande. Kuatro perashiyot son apropyados para esta ovra. En las perashiyot Vayakel i Pekude vemos ke se termino la fragua del santuvaryo i ya esta pronto por azer el estrenamyento.
La enkomendansa de guadrar el Shabat, en la perasha Ki Tisa vyene despues de la enkomendansa de la fragua de el Mishkan. En la perasha de Vayakel vemos enprimero el Shabat i despues la fragua del Mishkan.
En la perasha de Ki Tisa despues de la nominasyon de Betsalel i Aoliav komo kapos maestros nas enkomenda el Kriyador la grandeza de el diya de Shabat. El sinyor de Rashi eksplika dizyendo malgrado ve vajaser okupados kon vuestras echos, el Shabat no vola vaja olvidar.
Antes de enkomendar la enkomendansa de la fragua estamos enkomendados de santefikar el Shabat. Ibn Ezra lo entrepeta este verseto dizyendo: Malgrado ke somos ovligados de azer el komando de el todo poderozo tambien somos ovligados de no ezbivlar el diya santa de Shabat. Komo lo develope Rabi Moshe ben Nahman: “Sesh diyas vaja lavorar en la fragua del Mishkan i no el syeten diya por ke es santo para el Kriyador.”- Tambien el diya Shabat va ser santo i para vozotros.” En el livro Tora Temima dize ayegar sakrefisyos era un dover grande i spiritual en el tyempo de el Bet Amikdash i tambien se aziya korbanot en diya de Shabat. Por ke razon la fragua del Mishkan no fue permetida en Shabat? La repuesta es ansi los korbanot tyenen un tyempo fikso por ayegarsen, si paso su tyempo se puede baldar, de ayegar este sakrifisyo i puede pasar una enkomendansa de la Tora pero, por la fragua de el Mişkan no fue taksado un tyempo.
El Talmud konta: La ora ke Moshe Rabenu estava entremetido en el lavoro del Mishkan no se akonsejo kon los dirijentes del puevlo.
Les desplazyo muncho a los dirijentes, los dirijentes de el puevlo enpesaron a traer piedras presyados ke eran menesterozas para el Mishkan.
En el livro Mishle Shelomo Ameleh dize: Pensamyentos, kon konsejos se konfirman tambien en el livro Yehezkel vemos: “ i bushkaron vizyon de el profeta i konsejos de los viyejos”. De estos versetos entendemos ke Moshe Rabenu deviya akonsejarse kon los kapos de la nasyon.
Moshe Rabenu teniya razon. El plano de el Mishkan el todo poderozo se lo amostro a Moshe Rabenu. Todo ya estava pronto de parte de el Kriyador. Una koza ke esto enkomendada de parte de el Kriyador no es derecho de akonsejar de afirmarlo a no.
Ma vemos en el Talmud ke el Kriyador se akonsejo kon Moshe Rabenu por lo nominasyon de Betsalel. Moshe Rabenu le responde a el Kriyador, tu si lo ves petenesyente yo no te puedo dizir nada. Le dize el Kriyador malgrado todo va akonsejata i kon el puevlo i demandales. El puevlo responde dizyendo El Kriyador, “i tu si lo vesh pertenesyete a Betsalel por fraguar el Mishkan nozotros ke pudemos dizir”.
Kon dyes mandamyentos fue kriyado el mundo i ke deprendimyento? Para dizir: i desyerto kon mandamyento una puedia ser por ser kriyado salvo, por panarse de los malos ke depeyedren a el mundo ke fue kriyado kon dyes mandamyentos. İ por dar presyo bueno a los cuntos ke sostyenen a el mundo ke fue kriyado kon dyes mandamyento. Este paragrafo la meldamos en el livro Pirke Avot.
Este paragrafo ke meldamos en el sinken perek nos enbeza ke el Kriyador por dar muncha paga a los Tsadikim, a las personas custas, kriyo a el mundo kon dyes dichas, mandamyentos, ke el puediya kriyar a el mundo kon una dicha.
Por ke los Tsadikim las personas custas sostyenen a el mundo. Komo dizen nuestros savyos, el mundo se sostyene sovre la Ley i sovre el sirvisyo, i sovre la bienfezensya (dicha de Shimon el custo). İ Raban Shimon be Gamliel dize: “Sovre el cuisyo sovre la verdad i sovre la pas el mundo se sostyene”.
El mishkan el santuvaryo ke enkomendo el Kriyador a Moshe Rabenu de fraguarlo mezo de Betsalel, senboliza a el mundo. Tambien El Bet Amikdash ke fraguo Shelomo Ameleh era el mundo de el Djudyo. Komo dize en el midrash; “todo lo ke egziste en el mundo egziste en el santuvaryo”. Komo meldamos en le perasha de Yitro, “en todo luguar onde enmetaresh mi nombre, vendre a ti, i te bendizere”. Sigun la eksplikasyon de el Sinyor de Rashi, “en todo luguar ande enmentaresh mi nombre, es el santuvaryo”.
El santuvaryo es yamado ‘Kol amakom’ todo el luguar. İ el santuvaryo es el luguar onde mora la shehina, la divinidad. Si el mundo era en estado de el santuvaryo, el materyalismo no podestava ni egzistiya malisya en el mundo, i todas la personas eran custas. Dunka devemos ser custos i amar a la custisya. Komo dize en la Gemara de berahot. De el diya ke se destruyo el santuvaryo, la Tora nos mampara i devemos de estar syempre cuntos kon la tora. Kuando egzistiya el santuvaryo la ara el mizbeah onde se aziya los sakrifisyos perdonavan nuestros pekados. Oy el pranso ke es ordenado sigun la ley nos perdona. Dunke onde nozotros la yamamos, kon korason kumplido, a el Kriyador el nos responde. Syempre ke nos responda para byen.
