Tetsave

Rav Yeuda ADONİ Köşe Yazısı
17 Şubat 2016 Çarşamba

Veata Tedaber et Kol Hahme Lev Aşer Miletiv Rvah Hohma.

I tu avlaras a todos los savyos de Korason, los kualos yo inchi de esprito de savidurias.

La ekspresyon Haham Lev. “Savyos de Korason” lo meldamos por primera vez en la perasha de Tetsave i lo remarkamos en el sujeto de la fragua del Mişkan en las peraşiyot de “Ki Tisa i Vayakel” ke kere dizir savyos de Korason?

Ken tyene el merito de enkoronarse kon este titolo? La repuesta de estas kestiones lo puedemos topar en un verseto de la perasha: Uvlev Kol Haham Lev Natati Hohma. En el meoyo de todo savyo de korason pozi saviduriya. La persona deve de aprontarse por komprar sensya. Estonses el Kriyador da de su sensya a toda persona. Ansi se deve de aparejarse la persona por komprar la sensya, la buena veluntad de enbezar. Komo lo vemos en  Shelomo Almeleh, komo es dicho por el V.A Natan hohma lishlomo: El Kriyador le dyo sensya a Shelomo en Givon se aparesyo el todo Poderozo a Shelomo el rey. Le demanda dizyendo kualo enveluntas de mi? El responde dizyendo sinyor del mundo: Yo rogo de ti ke me dez un korason de pueder enbezar la sensya i pueder apartar lo bueno de lo no bueno. Le responde el Kriyador dizyendo: Por ke demandates demi sensya i no demandates de mi rikeza i vidas largas i yo te va dar a ti “Lev Haham Venavon” un korason savyo i entendido. Shelomo Ameleh tuvo merito solamente por el dezeo grande ke tuvo por konprar la sensya. El dezeo grande ke tuvo por la sensya i abondono la rikeza i las vidas largas.

Shelomo Ameleh saviya muy bueno ke las vidas i la rikeza sin tener sensya no tyene ninguna valor.

La persona deve de demandar verdadmente la sensya del Kriyador i kuando la alkanso tyene el merito de yamarse kon el titolo de Savyo de Korason Haham Lev.

Tambien de la estorya de Yeoshua bin Nun nos enbezamos ke el fue yamado kon el titilo İş Asher Ruah Bo Persona Ombre ke poseda un esprito. Ke puede resivir las fases de la divinindad. Una persona semejante es pronto a resivir la luz de las fases de la divinidad.

Yeoshua Bin Nun tuvo el merito de pasar por dirijente despues de la muerte de Moshe Rabenu sovre el puevlo Djudyo, solamente por ke era yeno de el esprito del Kriyador İsh Ashek Ruah Bo. Por ke demando del Kriyador la sensya por dirijir a la nasyon.