Terorizmo, gerras i eleksyones

Silvyo OVADYA Köşe Yazısı
28 Ekim 2015 Çarşamba

Kuatro mezes antes tuvimos las eleksyones en Turkia para eskojer los kinyentos i sinkuenta parlamentarios ke van a dirijar el pais kuatro anyos. Ma no reusheron o no kijeron formar un governo. I esto fue un problem muy emportante porke oy en dia ay problemes muy emportantes en los paizes vizinos komo la Siriya i el Irak. Ay grupos de terroristos de kada cheshit, unos muy relijiozos ke kortan mizmo kavesas kon espadas i malorozamente todo el mundo los konosen. Keren  formar un muevo pais islamisto en estos dos paizes. Ay otros grupos kurdes en muestro pais ke matan los soldados i los polises estos kuatro mezes komo anyos antes. Ay otros grupos Kurdes ke son teroristos para la Turkia i gerreadores para los Amerikanos o los Rusos;  mizmo para los Siriyanos porke estan gerreyando endjuntos kontra los islamistos fanatikos.

  En los paizes vizinos partikolarmente en Siriya la situasyon se esta trokando dospues de la partisipasyon de la Rusia kon sus aviones i sus roketas mizmo echadas de tres mil kilometros. La Amerika esta partajando la mizma idea i no se esta karisheando muncho para no  gerrear en estas tierras. Ma los dirijentes de muestro pais no estan muy kontentes de la intervensyon de la Rusia porke el ekilibro esta en favor dela Siriya kon Esat i los Kurdes ke keren formar kantones en estas tierras komo en Irak.

  Kon el governo de la Siriya malorozamente ay unos kuantos miliones de Siriyanos ke se fuyeron del pais i munchos vinieron a Turkia - mas de dos miliones - i kada dia ay sienes ke estan aziendo todo sus posibles para irsen a la Evropa ande no los keren. Este sujeto va ser tratado en un otro artikolo…

Malorozamente en estos kuatro mezes de alkavo bivimos atakos teroristos en diferentes sivdades. Dos semanas antes dos teroristos islamistos se mataron en la kapital Ankara en el empesijo de una manifestasion para la Paz en el Pais. I fue una desgrasya. Syen i dos muertos i kinyentos firidos ( yaralı ) – mas de sien almas estavan dainda en los ospitales dospues de sinko-sej dias. Es el atako  teroristo el mas barbaro de muestra istoria republikana.

   En dos anyos este alhad va ser la kuatrena vez ke los turkos van a partisipar a las eleksyones. La primera era para elijir los prezidentes de las munisipalidades, la segunda para el prezidente i la tresera para elijir los parlamentarios ke no reusheron a formar un governo. Es muy enteresante ke tenemos munchas personas en Israel ke tienen el pasaporto Turk. Ma malorosamente no se fueron a votar – solo serka de 90 personas para las eleksyones del prezidente. Esta vez maz de kuatro syentas personas tuvieron la responsabilitad  de ir a votar.

  Esta semana vo estar en Israel para una Bar Mitzva. Ma va tornar malorozamente alhad para votar. Las otoridades ( yetkililer ) preferaron de azer las eleksyones dos dias dospues de la Fiesta de la Republika en esperando ke una partida se iran a viajar. Pensan ke estas personas no votan para eyos. Ma estamos meldando en las gazetas ke los oteles tienen a penas dies por sien de rezervasion dia de alhad. Espero ke los rezultados van a ser por el bien del pais. Los lektrores estranjeros estan pensando a lo ke esto kontando? Ya se ke en los otros paizes las eleksyones no son  tan emportante ke en muestro pais. Ma tenemos una demokrasiya manseva ke se deve de maturar (olgunlaşmak ).