Los alhades del enverano en Estanbol

Silvyo OVADYA Köşe Yazısı
1 Temmuz 2015 Çarşamba

La semana pasada komo estava en el “Iftar” prezentado por la Komunidad Djudia en Edirne -No vos kero kontar todo lo ke bivimos en estos dos dias por ke a la fin me vash a demandar ke topo de kontar de una sivdad ande moran oy en dia dos o tres djudios no topi la posibilidad de eskrivir mi artikolo. Ma komo tenemos munchos gazeteros ke eskriven en judeo-espanyol, no tuvimos dingun problema. Tengo dos patronas en el semanario Şalom. La primera es muestra Klara Perahya ke lavora reelmente muy sistematika i es puntual. La sigunda es Virna ke es responsavle de toda la gazeta i ya se el lavoro ke tiene los martes. Ma de ves en kuando le telefono en demandando si nesesita mi artikolo para la oja de judeo-espanyol. I me dize la verdad.

En Estanbol el los mezes de mayo i de djunyo, kada alhad tenemos bodas. Estamos orozos de ver muestra komunidad ke esta pujando kon este modo de evenimientos. En enverano komo una grande partida de los djudios Estanbollis se van a las islas para pasar el enverano es mas yuch de ir i vinir a la sivdad kada fin de semana.

El alhad pasado devia de partisipar a los funerayes de un pariente en el simiteryo de Ulus i kon mi mujer tomimos el katamaran – ke empeso a lavorar solo viernes porke la eskala fue destruida por la furtuna ke tuvimos en el mez de febrayo o de marso; i los patrones ke azen los mas grandes aeroportos de muestro pais i del mundo no tuvieron la gana de repararla - para ir a Kabataş ande es la eskala i de aya a Maçka ande tengo la araba i de aya a Ulus. Komo devia asistir a la boda ke empesava a las dos me fui sin ke la seremonia s’eskape.

No era la primera boda del dia en la Sinagoga de Neve Şalom. La primera era a las 12.00.  Todos keren presto presto de ke no entyendo . Si demandas te van a dizir para el kuafor de las dammas o para las fotos ke se van a travar en el otel ande se va dar el pranso.  La boda era del ijo del prezidente del kal de Kuzguncuk, Beto Adato kon la ija de un amigo de mi chikes, Niso Benaroya ke mos vemos agora una o dos vezes al anyo. El kal estava yeno i fue una boda yena de alegria.

Komo munchos envitados eran envitados a una otra boda ke fue realizada en el Kal de Ortaköy, la gerra empeso kuando se serro las puertas del Ehal. Sienes de personas kon kravatas i kostumes, las dammas kon todo modo de fostanes estavan arrepushando i arondjando la djente para pueder ayegar a la teva ande se topan los paryentes -madre, padre i ermanos i los novyos para felisitarlos. Reelmente solo esta partida de las bodas es muestra verguensa. En esta boda a lo manko tres o kuatro personas me disheron deke no topo un remedio para eskapar este kombate. I me alavaron en dizyendo ke me topan kapache para rezolvar este problema. No saven ke es imposivle de topar un remedio. Anyos antes dishimos ke puedemos meter dos tefteres ermozos en la entrada i si todos eskriven sus nombres no tienen menester de suvir a la teva para felisitar los aktores del dia. Solo si el padre o la madre del novyo o de la novya tiene problemas de sanedad o siertos kavzos partikulares las famiyas preferan de no realizar esta partida de la boda -las felisitasyones aktivas. Ma no fue reushido. Kuando fue fraguado el Sento Kultural del kal dishimos ke va ser mas mijor de felisitar los novyos i las famiyas abasho en el Sentro. Esta vez el problem fue komo se deve abashar i kale azer tratamientos. Dospues de unas kuantas tentativas ya mos esvacheimos i de esto.

Oy era un dia azlahali. Me ambezi ke la ija de uno de las viktimas del atako a la Sinagoga Beth Israel de Şişli -2003el defondo Avram Varol se estava kazando en la sala de un otel debasho de la hupa. Noche de alhad en eskrivyendo este artikolo kije demandar unas kozas a mi ija sovre el kompyuter - komo los mansevos se entienden mijor de los ke no son mansevos - i estava en una boda ofisiel -nikah - ke es realizado por la munisipalidad.

Vos devo dizir lo ke izieron los dirijentes del pais. Desidieron ke no era mas emportante la boda ofisiel i si keren se pueden kazar solo por el rabino o el imam. Fin a oy deviamos de ser kazados en ofisial antes de vinir a la boda en el kal. Esta vez muestos dirijentes estan pensando komo pueden azer las dos seremonias el mizmo dia – un fostan manko i ke ekonomias – ma no toparon komo azerlo kon las leyes de la Halaha i un alay de problemes ke topamos.

Dospues de meldar este artikolo puedesh entender las difikultades ke tienen los dirijentes de muestra komunidad i mizmo de todas las komunidades solo kon este kavzo.