Kero empesar en ekskuzandome sovre mi artikolo ke va apereser en El Amaneser este mes. Esto avlando sovre los artistos de la muzika sefaradi en muestro pais. Ma savesh ke es posivle de olvidarse de unos kuantos grupos o artistos. Dingunos tienen el derecho de dizirme “deke te olvidates de…?” Porke para mi el grupo el mas emportante era el koro de Yeshua Aroyo ke empeso su aktivitad en los anyos ‘70 i tuvo una aktivitad durante munchos anyos. Los primeros anyos el grupo era formado de las mansevas i mansevos de muestra komunidad i kantavan kantes judeo espanyoles, dospues era formado de mansevos de todas las relijiones i kantavan madrigales. Yeşua Aroyo ke es un amigo, reelmente era muy kapache en la muzika ma malorozamente oy en dia no lo estamos viendo en las shenas. De ke este grupo era muy emportante? En primero porke yo era uno de los miembros de este koro kon munchos amigos komo Melih Aji (avokato), İzi İyiadato (oy en dia bive en San Diego), Niso Maçorro (ijo del famozo hazan İzak Maçorro), Cozy Levy (ke aze programes de musika brezilyana en la radio – Açık Radyo), Cako Kuruner, Pinhas de Taranto (malorozamento mos desho la buena vida en un aksidente de trafiko). Entre las mansevas me akodro de Feride Franko (Petilon), Sara Saban, Lusi Bonfil, Daisy Benbasat (Filiba), Elzi Kalma i otras mas. Sin foto no m’esto akodrando de las otras. El segundo grupo es “Erensia Sefaradi” ke fue formado por Sara Yanarocak (vokal), David Yanarocak (gitara i vokal) i Gery Erdemanar (perkusion i bateria). I muestro amigo Yusuf Altıntaş estava eskriviendo palavras a las kompozisyones muzikales de Hayim…
Agora puedo eksprimir unas kuantas ideas sovre las eleksyones en Turkia. En mi artikolo eskito en turko demandi deke los kompatriotos turkos biviendo en otros paizes ke la Turkia no se van a votar. En las eleksyones de prezidensya solo 8 por siyen de los elektores se fueron a votar. De ke esta indiferensya? En Israel solo 92 de muestros sivdadinos sovre los sinko mil fueron a votar. El porsantaje el mas basho? Ya se ke no tienen dingun provecho ma es un dover de ir a votar komo los turkos ke tienen una segunda nasionalidad i ke se van el dia de voto a los konsolatos para kumplir sus doveres.
Es por la primera vez ke los kuatro partidos politikos ke se topan en el parlamento estan tan pretensyozos para ser en un estado mas fuerte ke de la situasion aktual. Las muzikas, las publisidades ke se trokan kada dia. Todos propozan oportunidades ekonomikas para obtener muevos votos.
Las manifestasyones se estan realizando kon una djentorya muy importante, no solo en las sivdades de una sierta emportansa, ma en todas las sivdades.
En todas las plasas es posivle de topar bandyeras i banderolas de todos los partidos. Las sivdades estan ornadas komo un dia de fiesta.
En las manifestasyones el livro de ley es empleado komo un furnimento muy emportante. Ma malorozamente esto esta meneando la esensya del laisizmo.
Es vedra ke tuvimos atakes en los lokales de siertos partidos; ma kon este atmosfer reelmente el rezultado no es tanto katastrofiko.
El dia de alhad devemos de emplear muestos votos. Mizmo si no tenesh la fuersa para ir a votar, kreo ke un mansevo vos va ayudar para realizar vuestro esforso.
Esto augurando un rezultado ke va kontentar la mas grande partida de muestros sivdadinos.
