Şemot

Rav Yeuda ADONİ Köşe Yazısı
8 Ocak 2015 Perşembe

Los Ejipsyanos vyendo ke kon todo ke estan afriyendo a el puevlo Cudyo, kon esta fuerte i dura ovra, no estan puedyendo valir kon eyos. Kuanto mas los afriyiyan i apezgavan sus sirvimyentos en los kanpos i en las kazas, mas se avian muchiguando i enfortesyendose.

Le dyeron avizo al rey por ke de una idea ke manera valer kon este puevlo i atemarlo enteramente. Despues de azer un konsilyo sovre esta echo desidaron entre eyos, de azer matar todos los ijos ke nasen de este puevlo. İ al punte mando a yamar Paro a los komadres kaporales ke resivian a las parideras Cudiyas ke se nombravan Şifra i Pua i les enkomendo ke kuando resiven a los nasidos de los Cudyos, si ven ke es ijo, ke lo maten sekretamente, i si es ija ke la deshen biva i kon este envento pensaran de atemar a el puevlo Cudyo.

Pero, El Kriyador no estuvo de akordo kon este mal pensanyento de los Ejipsyanos, i las dichas komadres espantandosen del Dyo Santo, no dyeron ninguna emportansa a la enkomendansa de Paro i arebivian a los ijos.

Paro no se deskorajo por esta de su negro penseryo i sovre el konsejo de Bilam i de resto de sus savyos se permetyo de enkomendar klaramente a su puevlo ke todo ijo ke les nase a los Cudyos ke lo echen a el rio. İ solo a las  ijas ke las deshen bivas.

Estonses uvo una diferensya de ideas entre el puevlo Cudyo. Uvo entre eyos ke se partaran de sus mujeres por no ser kavzantes de matarlas a los ijos ke les vana naser. Pero uvo tambien personas ke no la toparon esto de custo i eyos aziyan su dover. Kuando viniya ora de parir sus mujeres aziyan todo lo posivle par eskapar a sus kreaturas de la muerte. Kualos los eskondian en sus kazas i kualos los deshavan en medyo los kampos en fi uzyandosen en el Dyo ke tendra sus kudyado.

Amram, estava de la primera idea, despues de averle nasido una ija nombrado Miryam i un ijo ke lo nombro Aaron se espartyo de su mujer sovre el konsejo de Miryam su ija. Amram tomo de nuevo a su mujer Yoheved despues de 7 mezes en el 7 Adar de este anyo le nasyo un ijo ke fue MOSHE RABENU.