Leh Leha

Rav Yeuda ADONİ Köşe Yazısı
30 Ekim 2014 Perşembe

Avraam Avinu sigun el orden de El Kriyador tomo a Sara i a Lot su sovrino i vinyeron a la tyera de Kenaan. Estonses se deklaro unas diferensiyas entre los pastores de Lot sovrino de Avraam, kon los pastores de Avraam por kavza de la tyera no abastesiya a mantener la muchidumbre de ganado ovejas i katropeas ke teniyan entre eyos.

Avraam Avinu keryendo evitar ke no uvyera pletos entre el i su sovrino, le rogo a Lot su sovrino, de espertirse de el i irse a luguar ke le plaze mijor.

Lot izo lo ke disho Avraam Avinu, i eskojo la yenura de el Yarden ke es serka de las sivdades Sedom i Amore, i fue i se aresento a ai. Avraam se asento en la tyera de Kenaan, en Hevron en las yanuras de una persona nombrada Mamre. En akeos tyempos se deklara una gerra entre los reyes de akeos luguares. Los reyes de Sedom i Amora i otros tres reyes de una parte i Kedorlaomer rey de la sivdad de Elam i tres reyes kon el de otro parte.

La batalya fue vensida por Kedorlaomer i su partida, i tomaron todos los byenes de Sedom i Amora. İ se yevaron tambien a Lot i a toda su azyenda.

Tuvyendo avizo Avraam Avinu, de este akontesimyento tomo kon el 318 personas de sus kompanyeros i los alkanso, i destruyo todo su fonsado, i rezgato a Lot su sovrino, i todo su azyenda i a Sedom i a Amora i todos las personas ke fueron kativadoe.

Avraam se torno a su luguar i Lot se fue a Sedom akompanyado de los reyes.

Estonses, le dyo a saver El Kriyador a Avraam Avinu, kon profetiziya todo lo ke tyene ke pasar, su semen despues de tyempo i ke tenian ke estar kativos en tyeras ajenas i le prometyo a el i a su semen prometos grandes.

Syendo Avraam Avinu de 99 anyos, le komendo El Kriyador ke se sirkusyera el i Yismael su ijo i todos los machos de su kaza. Esta enkomendansa de Mila deven de guadrarla su semen para syempre ke es un sinyal de aliansa i amistad ke izo El Kriyador a Avraam de darle un ijo de Sara su mujer despues de un anyo.