Beşalah

Rav Yeuda ADONİ Köşe Yazısı
1 Şubat 2012 Çarşamba

El puevlo cudyo solyo de Raamses i arivaron a Sukot. Estando en la sivdad de Sukot les apronto el Kriyador de una manera milagraza komo dos pilares, uno de fuego i uno de nuve, ke iva adelantre de eyos. El pilar de fuego iva kon eyos la noche por arelumbrarlos i el de nuve iva el diya por amostrarles el kamino el segundo diya. Diya de 16 Nisan, enpeso a kaminar delantre el real el pilar de nuve i el puevlo se fueron detras de el i pozo en un luguar nombrado Etam. Ke es en los kavos del dizyerto de este luguar se puidan ir muy bueno a el monte de Sinay sin pasar por Ruvya tomando el kamino por la parte de Tsafon de esta mar. Pero el Dyo le enkomenda a Moşe Rabenu, ke se tornaran atras de este kamino i ke apozen de delantre de la sivdad Pitom en un luguar estrecho entre la mar ruvyo i la forterisa de esta sivdad del Ejipto i los cudyos izyeron ansi.

Arivando a este luguar, se topa el puevlo de Israel en un estado muy perikolozo. Paro vyendo ke los cudyos tornavan a este luguar.

Penso ke estan mareyados en el kamino i no saven por ande ir i vinir, i olvidandose Paro de todos los males ke pasaron por su kavesa, se arepintyo de lo ke izo de deshar i a los cudyos de su tyera i pedrer tantos esklavo arekoje una armada muy fuerte, iva presi (...) a los cudyos i los alkansa en este luguar en el sejen diya ke salyeron de Mistrayim.

El puevlo cudyo se topa en el mas grande dezespero i no save lo ke azer porke, tomar i gerear kon una armada tan fuerte sin estar eyos aparejados para esto i kon famiyas mujeres i kreaturas. Fuyir, esto tambien era enposible, syendo de una parte teniyan la mar onda, i de otra parte el fonsado ejipsyano, otros propozavan de mizurarsen kon los ejipsyanos sovre lo ke kere ke seya otros pensavan de ovedeser a sus vyejos patrones i tornor atras a Mistrayim a sus esklavaje.

El todo poderozo ya save lo ke aze i le dize a Moşe Rabenu ke diga a el puevlo cudyo, ke no se espanten i ke enpesen a kaminar sovre la mar. El santo bendicho el le dize a Moşe Rabenu espande tu mano sovre la mar i partila i ke kamine el puevlo cudyo por la mar komo fuera tyera.

Moşe izo el komande de el Kriyador i kon un fuerte ayre ke aparejo el Kriyador, se seko la mar komo si fuere tyera. Entraron los cudyos diyentro la mar i pasaron por ayi myentres la noche entera kaminando komo se kamina por lo seko.