En el livro de Shemot la fragua de el santuvaryo okupa un luguar muy grande. Kuatro perashiyot son apropyados sovre este sujeto. En la perasha de Vayakel meldamos ke Betsalel ben Uri ben Hur ke era del trivo de Yeuda parvino, i reusho kon nombre de el Kriyador a fraguar el mishkan, el santuvaryo.
Meldando estas perashiyot, no solo vemos la fragua de el mishkan si no ke tambien vemos la enkomendansa de el diya de Shabat.
En este sujeto, vyene a enbezarmos, el Kriyador, ke malgrado, el mishkan es una ovra santa, todos las ovras ke son defendidas de azer en shabat, no se puediya ovrar tambien en el mishkan.
La Tora nos enbeza ke el Kriyador kriyo e el enterval de sesh dias el mundo. El Kriyador lo yamo a el syeten diya, Shabat. El demando de todos nozotros de santefikarlo i onorarlo. El cudyo ke guadra el Shabat i lo santefika atorga ke el Dyo es el fondador de el mundo. El puevlo cudyo resivyo sovre si de guadrar el Shabat. El las afirmo todas sus enkomendansas kon grande alegriya. Asyende luzes en su kaza i amostra la alegriya de el diya de shabat. Kon el Shabat Dyo es yamado Kriyador de el mundo. Shabat kere dizir dar al ombre un repozo i enforteser la fuersa de su kuerpo. Devemos de azer una diferensya de Shabat a los diyas de entre semana.
Santefikar el Shabat kere dizir, konsakrarse a las orasyones, darse a el estudyo de la relijyon. Este diya es el tyempo mas custo para el kumplimyento de su alma. El diya de Shabat es un sinyal de amor entre Dyo i nozotros, esta aliansa no deve ser anulada. Eya esta figurada en las tavlas de la Ley, komo una de las bozas fondomantales de le relijyon cudiya.
Regalo valorozo tenemos en nuestro poder ke su nombre es Shabat i esto es su valor, lo puedes entender sea relijyozo sosyal i kültürel. En el topas la ermozora la santedad i el briyo.
La enkomendansa de Shabat esta en primer rango en las ovligasyones de las personas ke resivyeron sovre eyos las konosensyas del cudaismo.
