Los medyos sosyales i los programes en la TV i Internet

Köşe Yazısı
24 Mart 2020 Salı

La semana pasada vos dishe ke no kero mas eskrivir sovre el Virus de Corona. Ma komo la situasyon se esta agravando no tenemos otra koza de avlar. No vos va kontar lo ke se pasa en la Italia, Espanya o la Turkiya. No se mizmo si vamos a pueder publikar muestro semanaryo Şalom. Ma yo esto eskrivyendo mi artikolo.

Alhad demanyana me esperti a las 8.30 i komo empleo el telefon mobil komo ora para ke me esperte, esto vyendo ke ay serka de syen whatsappes ke vinyeron entre la una de la demanyana i las ocho i medya. Empesi a mirar lo ke vino, de ke vino? Estamos pasando el tyempo kon esto. Mirando los whatsappes i embiyandolos a otros grupos.

Ma estamos vyendo muevas aktividades kulturales. Me embiyaron una lista de livros audio ke puedesh segir (meldar) oyendolos. Son livros audios para los ke no les plaze meldar muncho. Ma es muy enteresante. 57 ojas ande se topa mas de 1.200 livros meldados. Ke rikeza.

Unos kuantos puntos antes me embiyaron una lista sovre el kanal TRT2 ande vamos a pueder segir kada martes una pyesa de teatro, kada noche de shabat un konsyerto senfoniko o  konsyerto sovre una opera i kada shabat la noche una opera komo Aida, Troya o La Boheme. De ke no azen estos esforsos kuando no ay dingun Virus? No se.

Nicole Polge de Paris me embiyo una lista de e-mailes ande puedesh vijitar munchos museos. I kuando vide esto avli kon muestra direktrisa Nisya, i kreo ke vamos azer syertos esforsos para azer un filmo de 7-8 puntos (ya se ke es bastante largo) kon Alberto Modiano para ke los ke keren vijitar el Museo Djudio de Turkiya a lo manko ke veygan lo ke se topa. Keria envitar syertas semanas diyas de alhad, dos grupos al Museo para vijitar endjuntos la rikeza ke tenemos. Unas kuantas vezes tuvimos la posibilidad de azer vijitar a syertas personas el museo kon Nisya. I este torno dura serka de una ora i medya o dos oras. I kuando azemos esto, tenemos mizmo la posibilidad de kontar syertos evenimyentos istorikos.

El Sentro Sefardi de Estanbol ay serka de un anyo ke esta lavorando sovre el proyekto de proverbos i dichas. Agora ke no ay salir a la kaye,  kreo ke vamos a topar mas muncho tyempo para realizar mas presto este proyekto muy valorozo.

Tengo tantos proyektos ke devo de realisar kon el Sentro Sefardi, el Museo i syertos livros ke tengo el materyal i devo de redijar para ke se publiken.

Esto augurando ke estos diyas van a topar fin en unas kuantas semanas i vamos a tornar a muestras vidas ordinaryas. Ma no vos olvidesh ke la vida no va ser la mizma despues de esta kriza. Esto esperando ke la djente va azer mas atension para ke la natura no se mallogre.

 

Siz de yorumunuzu yapın

Tüm Yorumları Görün