Una ekspozisyon en Andirne i un konsyerto en la Sinagoga de Haydarpasha

Silvyo OVADYA Köşe Yazısı
2 Ekim 2019 Çarşamba

Diya de Alhad, unas kuantas oras antes de fiestar la anyada mueva 5780, unos kuantos amigos mos fuimos a Andirne para la avyertura de una ekspozisyon en la sala de ekspozisyones de la Grande Sinagoga de Andirne. Ay tres anyos ke la asosyasyon SEHAK ke lavora kon la Kaza Anne Frank de Amsterdam i kon el apoyo de la Union Evropea esta organizando la ekspozisyon de Anne Frank, la manseva djudia alemana ke fuyo el pais para enstalarse kon su famiya a la Olanda ande fue apanyada unos kuantos mezes antes de la fin de la gerra i malorozamente fue matada en el kampo de Bergen Belsen. Ay tres anyos ke esta ekspozisyon esta sirkulando en diferentes sivdades i en diferentes lugares de la misma sivdad. Kreo ke estamos verso la fin. Ma es un evenimyento importante porke en mizmo tyempo estan organizando un workshop ande van 10-12 personas i syertos djudios ke tyenen raporto kon esta sivdad estan lavorando para egzaminar el antisemitismo i los sentimientos de la djente sovre syertos evenimyentos. Kreo ke la koza la mas emportante es de realizar la vijita de los elevos de las eskolas de esta sivdad para ke se ambezen la krueldad ke okurro durante la Segunda Gerra Mondial kon la muerte de sesh miliones de Djudios. La ekspozisyon es realizada sovre el livriko de rekuerdos de esta ijika Anne Frank; ma mizmo ke savesh lo ke se paso en este tyempo vos va vinir ganas de yorar meldando todo lo ke esta eskrito en los panos.

Una semana antes, de muevo diya de Alhad, kon la famoza pianista Renan Koen, mos fuimos a Haydarpasha para vijitar la Sinagoga Hemdad Israel para ver si puedemos organizar un konserto kon piano i dos pianistas/tos. Un konserto para komemorar el Olokosto. Ya savemos ke Renan Koen es renomada kon sus kompozisyones muzikales ke tyenen raporto kon el Olokosto. Es el konsulato Chek ke esta pronto para finansar este evenimyento. Para los ke no saven, los anyos dalkavo la Republika Chek i su konsulato en Estanbol estan organizando munchas aktividades kulturales ke esta atirando la atension del publiko. No dimos dainda karar. Ma esto kontente de azer konoser a Renan esta sinagoga ke reelmente se deve emplear para konsiertos no solo para la Komunidad Djudia ma mizmo para los festivales muzikales.

Esta noche de Alhad fiestimos los 5780 anyos de la Kreasyon del Mundo. Para tener una anyada dulse tenemos el uzo de komer en primero una kuchara de dulse de mansana en la meza. Para partajar este uso en la avyertura de la ekspozisyon en Andirne mos fuimos kon un kavanoz de dulse de mansana para ogurar la mizma koza kon toda la djente.

En tornando de Andirne kon mis amigos tuve la posibilitad de amostrarles los videos ke realizo İzzet Bana kon las kriaturas de las Estreyikas d’Estanbol para un proyekto ke se esta realizando en İsrael. Les kayo la bava i reelmente les agrado muncho lo ke las ijikas i ijikos de mueve o dyez anyos estavan avlando/kontando/kantando i djugando. Reelmente devemos de felisitar a İzzet Bana para sus esforsos i para su lavoro.

 

Siz de yorumunuzu yapın

Tüm Yorumları Görün