El diya internasyonal del Ladino

Silvyo OVADYA Köşe Yazısı
25 Eylül 2019 Çarşamba

Ya savesh (esta vez Karen va estar kontente por ke eskrivi el savesh kon sh i no kon j komo lo ago munchas vezes) ke kada anyo organizamos, de preferensya en el mez de febrero, el Dia del Ladino. El anyo pasado kon mas de kuatroshentas personas i kon aktividades ekselentes fue un diya de las maraviyas. I kreo ke todos se fueron kontentes. I estavan kontentes kon la komida sefaradi ke se ofresio. Dos semanas antes izimos una reunyon ande un Espanyol vino para dizirmos ke esta aparejando un sit de internet ande se va eskrivir solo i solo en judeo-espanyol. Viendo la kapachedad ke ay en Estanbol se komporto muy bien kon mozotros (esto azyendo shakas). Ma muestro buto era de tomar unas kuantas fotos teniyendo en la mano las letras de “V I D A S L A R G A S” para azer fotos i kuadro para muestro Haim Vidal Sephiha i para la Asosyasyon de Vidas Largas. Kuando me fui a Paris tuve la okasyon de konoser una damma, Nicole Polge ke es la inyeta de una mujer ke se fue de Estanbol a Nimes. Eya mizmo bivio unos kuantos anyos en Turkiya en Estanbol porke su marido era el Direktor Jeneral de la Peugeot en Turkiya. I todos le demandaron “Kuando mos vas a yevar a Estanbol?”. I les dishe ke “Vos estamos asperando para el Diya del Ladino el 16 del mez de Febrero”. No se si era shakas o si era una koza seryoza. No se si avlan bastante bueno el Djudeo-Espanyol? Ma esto siguro ke lo entyenden bastante bueno! I es una de las raras komunidades ke son tan enteresados en la Kultura Sefardi. Reelmente fui muy kontente de estar endjuntos kon eyos en este diya ande fyestaron los kuarenta anyos de sus asosyasyon i onoraron sus prezidente Haim Vidal Sephiha.

 Sesh dias despues me embiyo un mail dizyendo ke estava interesada para organizar un viyaje para Estanbol. Le aprometi mizmo ke mos puediamos irmos a Andirne i vijitar la sinagoga. Les dishe ke mizmo kuatro dias no era bastante para este viaje. Para vijitar el Museo Djudio, para pasar la Noche de Shabat, para pasar el Diya del Ladino i tantas otras kozas.

Kuando konti estas kozas no era siguro si el 16 Febrero estava el diya libero para muestra komunidad i para muestra eskola. Es diya de lunes ke dimos karar definitivamente para esta data avlando kon el Auditoryum de muestra eskola. Agora empesamos a lavorar para reushir este diya.

 Vos kero avlar unos kuantos biervos sovre una konferensya ke se realizo en el Klub Anadolu en la Isla de Prinkipo. Era una konferensya sovre lo ke los Levantenes (Los Evropeos ke vinyeron de diferentes paizes en el Imperio Otomano empesando a la fin del siglo 18). I vemos mizmo oy en diya son patrones de kompanyias muy emportantes (puedemos avlar de kompanyias de transporto por la mar). I si son rikos ayudan muncho muestra kultura de arte. La famiya Arkas en Izmir organiza ekspozisyones maraviyozas mizmo komo Picasso oy en diya ke es vijitado kada diya por mas de mil i kuatroshentas almas. Ma malorozamente los Levantenes en Turkiya son apenas mil i kinyentas o dos mil personas. Si vijitas la isla de Prinkipo devesh de ver la ekspozisyon de fotos ke se topa en la Skala de los vapores. Son fotografias del famozo Studio Sebah-Joallier.

 Para eskapar mi artikolo vos va dizir ke aviamos topado un livro en Andirne: “Romeo Juliette en Judeo-Espanyol emprimado en Salonika en letras ebraikas o Rashi. I es muestro amigo Metin Delevi kon su famiya ke konvensyo el sinyor ke teniya este livro para ke lo de al Museo. I lo skaneimos. Keremos transliterarlo. I kreo ke muy poka djente oy en diya tienen el mazal de meldar o de oyer el Romeo Juliette de Sheakspeare en Djudezmo.

 

 

Siz de yorumunuzu yapın

Tüm Yorumları Görün