kanada REklam

‘The Jewish Wardrobe’ - La Koleksyon de vistidos Djudios

‘The Jewish Wardrobe’ - La Koleksyon de vistidos Djudios

Era el anyo 1989, tres anyos antes ke se realizaron las festividades sovre los 500 anyos de la ekspulsion o de ke los djudios sefaradis vinyeron a las tierras otomanas, el Dr. Gad Nassi - ke su alma repoze en Gan Eden - avia organizado un kongreso muy emportante sovre los Djudios Otomanos i Turkos. Era el primer, tuvo un grande sukseso, ma malorozamente fue el dalkavo. No se de ke? Gad era un ombre modesto ma kreo ke kijo azer munchas kozas. En esta epoka el governo Turko se komporto de una manera muy pozitiva por este kongreso ke se realizo por una semana entera.

I durante este kongreso tuvimos la posibilidad de vijitar dos ekspozisyones reelmente muy emportantes. La primera fue organizada en el Muzeo de Beth Hatefutsoth / Muzeo de la Diaspora ke avia arekojido buen karar de fotografias sovre los Djudios del Imperio Otomano i de Turkiya todas travadas en las tierras turkas. I eskojeron sinkuenta deyas entre eyas i izyeron una ekspozisyon. Kuando torni a Estanbol les eskrivi dizyendo ke keria esta ekspozisyon para el Şalom. I me embiyaron el presyo ke kerian para duplikar esta koleksyon i me los embiyaron. Estamos pensando de azer de muevo, trenta anyos despues, esta mizma ekspozisyon en muestro Muzeo. I kreo ke va tener bastante sukseso.

Kualo es la relasyon del titolo de mi artikolo kon todo lo ke vos esto kontando? En el mizmo kongreso avia una otra ekspozisyon en el “Israel Museum” ke reelmente es el muzeo ande es posivle de topar todo sovre los Djudios del mundo entero. Esta vez era una ekspozisyon etnografika. Era la primera vez en mi vida ke aviya visto tanto objektos relijiosos, tanta vistimienta (de rabinos, de novias...), tanto material (parohetes, mapas, kuvyertas de Toras...), objektos ke se uzaron en las sinagogas (Sefer Toras, rimonimes, punteros, i todo modo de kozas ke se uzan en la sinagoga...) La eksposition era en una sala grande, mizmo muy grande. Publikaron el livro de esta ekspozisyon ke vendimos syenes en el Şalom.

Ken eran los kuratores de esta ekspozisyon? Ester Juhasz i Miriam Katz. Konosi a Ester i a Miriam. Miriam era la mujer del ministro Katz. Eya era Izmirliya i tuvo un grande sukseso en arekojendo tanto material de muestra komunidad. De İzmir, de Estanbol i de todas las komunidades ke se topan en muestro payis. Fue pekado para mozotros ma fue muy emportante para este muzeo ke es el mas emportante muzeo etnografiko sovre los djudios en el mundo.

I unos kuantos mezes antes Nisya, muestra direktrisa del muzeo me demando si era enteresado en un livro intitulado “The Jewish Wardrobe”? Deke no. La validja kon los livros no vino a Estanbol, se piedreron. I a la fin alkansi a merkar el livro. I mirando vide ke este livro fue realizado kon el ayudo de Ester Juhasz ke no lavora mas en el muzeo ma ke les ayuda kuando es de menester. Le embiyi mizmo haber si mos puede ayudar para la reparasyon de muestros parohetes i mapas? Estash viendo la kacha del livro ande puedesh ver kuatro fostanes de novia ke fueron empleadas en İzmir. Es posivle de topar siertos artikolos ke fueron empleados para los bebes en la fashadura, en el berit, en la vijola i en la vida de bebes. Ke no vos pareska ke este livro es solo por los djudios otomanos i turkos. Es preparado kon los objektos de los djudios de las kuatro partes del mundo. Si estash enteresados en este modo de livros devesh de merkarlo del “Israel Museum”.

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın