kanada REklam

Las Islas de Prens

Las Islas de Prens

Anyos antes las Islas de Prens ke se topan a kuarenta puntos del sentro de la sivdad era el lugar el mas prestijioso para la djente. Las personas de alta sosyeta, los merkaderes rikos, los ke les plaziya djugar todo modo de djugos de kartas, personas de un nivel alto kultural, djente ke amavan los artes, la muzika venian a las islas para pasar unos kuantos mezes. Si vos akodrash, las eskolas se serravan la semana dalkavo del mez de Mayo, i las eskolas se avriyan en el empesijo del mez de Oktubre. Kuatro mezes. Oy troko esto todo i los elevos tyenen komo vakansas solo dos mezes i medyo. Mizmo esto va trokar. Kada anyo estan topando un muevo system para las eskolas. I dingunos de estos sistemes son reushidos.

La semana pasada noche de alhad, dospues de Shabat, estavamos envitados a la kaza de muestros amigos ande su ija se devia de espozarse el mizmo diya. Estavamos envitados a sus kaza ke alkilaron i ke se topa ensima de la mar. Estamos avlando ke ay munchos mansevos ke se estan indo a otros payizes. Ma ay buen karar de mansevos ke se estan kedando en muestra sivdad i en muestro payis. En esta envitasyon kreo ke avia bastantes mansevos ke vinieron mizmo de la sivdad. I reelmente fue una nochada muy reushida kon muzika asta las dodje de la noche. Era una noche ke mos izo akodrar el tyempo pasado de las Islas.

El anyo pasado vos konti ke repair en primero i despues ayudi para dar una Sefer Tora i un parohet al Muzeo de la Sivdad de las Islas. El presidente de la fondasyon me telefono para ke le ayude. Kerian filmar una orasyon. I avli kon el presidente de la fondasyon de muestra sinagoga. I achetaron. Diya de alhad filmaron la orasyon ke vamos a pueder ver en el Muzeo. Este modo los ke van a vijitar el Muzeo van a konoser la prezensia djudia en las Islas.

Kada dos anyos en Estanbol se realiza el Bienal. Dos anyos antes lo izieron en Estanbol i en la Isla de Prinkipo (Büyükada) i tuvo un grande sukseso. Dizen ke serka de kinyentas mil personas vijitan este bienal en Estanbol. I dos anyos antes serka de syen i sinkuenta mil personas vinyeron a la Isla. Dizen ke mas de la meatad eran personas ke vinyeron de otros payizes. Este anyo el Klub Anadolu izo todo modo de esforsos i un edifisyo (el edifisyo amario ke es el primer sentro del Prinkipo Yacht Club) fue rezervado para este evenimyento. Mizmo el restoran del Club va ser avyerto dos mezes para servir a los vijitadores. I kreo ke los proprietaryos de los magazenes van a ser kontentes de ver otras personas ke los Arabos. Los anyos dalkavo un grande shifro de turistos arabos estan vinyendo a muestra sivdad i a muestra isla. Es djusto ke estavamos kontentes de verlos kuando los evropeos no estavan vinyendo. Oy en diya savemos ke munchos turistos evropeos i de la Amerika del sud estan vinyendo a vijitar muestro payis. I kreo ke kon los kruzes ke empesaron a vinir a Estanbol, el aspekto de los turistos va trokar. I ay posibilidad kon esto todo ke las islas van a ser mas presyozas

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın