El puevlo djudyo en estando en la sivdad nombrada Sukot, les apronto el Kriyador de una manera milagroza dos pilares, uno de fuego i una de nuve ke iva adelantre de eyos. El pilar de fuego iva kon eyos la noche por arelumblarlos, i el de nuve iva el diya por amostrarles el kamino. El segundo diya, diya de 16 nisan empeso a kaminar delantre el real, el pilar de nuve i el puevlo se fueron detras de el … i pozaron a las kavos del dizyerto. El Dyo Santo le enkomendo a Moshe Rabenu ke se tornaran atras de este kamino, ke apozen entre la mar ruvya i la forterisa de esta sivdad del Ejipto i los djudyos izyeron ansi.
Arivando a este lugar, se topa el puevlo en un estado muy perikolozo. El rey del Ejipto, vyendo ke los cdjudyos tornaron de nuevo a este lugar penso ke estan mareyados en el kamino i no saven por ande ir i vinir i olvidandose de todos los males ke pasaron por su kavesa se arepintyo de lo ke izo deshar ir a los djudyos de su tyerra i pedrer tantos esklavos i arekoje una armada muy fuerte i va presigir a el puevlo djudyo i los alkansa en este lugar en el sejen diya ke salyeron de Misrayim. Alora se topa el puevlo djudyo en el mas grande dezespero i no save ke azer.
Pero, el Todo Poderozo ya save lo ke aze el le dize a Moshe Rabenu ke diga a el puevlo djudyo ke no se espanten i ke empesen a kaminar sovre la mar, i “Tu,” le dize a Moshe Rabenu “espande tu mano sovre la mar i partila i ke kamine el puevlo djudyo por la mar komo si fuera en tyerra”.
Moshe Rabenu izo el komando del Kriyador. El Kriyador apareja un ayre ke seka la mar komo si fuera tyerra. En el empesijo de la noche setena en el 21 Nisan entraron los djudyos dyentro la mar i pasaron por ayi myentres la noche entera, kaminando komo se kamina por la seko.
