Tzav

La manera de la enkomendansa ke enkomendo El Kriyador a Aaron Akoen, sigun Rashi i munchos komantaryos, demonstran de ser akavidado en el sirvisyo de la santedad, de no ser haragan. Las enkomendansas i las echas buenas se deven de azer kon un grande entusyazmo. Aman ke kijo enmaleser a el puevlo Djudyo en ojos de Ahoshverosh, Rey de Paras le dize egziste un puevlo entre nozotros ni a tus ordenes respektan ni sus doveres egzekuten. Le kijo dizir, no tyenen entusyazmo por aplikar sus doveres. I Amalek vino a pelear kon el puevlo Djudyo kuando estavan floshos vizavi de las misvot.

Pero, kuando se aunaron a orasyonar por sus vidas de sus ninyos, se esperto Ahoshverosh dizyendo ke le melden el livro de las membrasyones. Kuando nozotros azemos nuestros doveres kon entusyazmo, El Kriyador de vista nos ayuda. Ek El Kriyador ni durme ni adurme, i es el guadrador de Israel.

Ser akavidozo kere dizir de no deshar lo ke se deve de azer oy, al diya de amanyana. Aman mando kon prisa personas a las sivdades de el pais Paras, Has ve Shalom por atemar a el puevlo Djudyo. Mordehay kon ayuda de El Kriyador trusho la salvasyon de kontino a el puevlo Djudyo. Trusho alegriya, luz i gozo a el puevlo. El pasaje de Purim nos enbeza de tener la esperansa solo i solo en El Kriyador.

La santedad de Aaron poseda el puevlo komo esta eskrito en la perasha de Yitro; vozotros vash a ser reynado de Saturdes, Koanim i djente santa. Komo en la perasha Tsav, vemos ke Aaron deve ser akavidozo en sus misyones, ansi nozotros el puevlo Djudyo devemos ser akavidados i afirmar las enkomendansas kon un grande entusyasmo.

 

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın