No kreo ke una persona pueda resistir despues de meldar este artikolo a no vinir este alhad (el 10 de Febrero) al Oditoryum de muestra eskola. Es por la primera vez ke estamos realizando un diya ke va ser tanto reushido. Ay unas kuantas vezes ke vos esto kontando sovre este diya. Vos djuro, oy diya de lunes kuando estava eskrivyendo este artikolo 200 personas avian telefonado para pueder vinir diya de alhad.
Keridos amantes de muestra lingua, este anyo vash a tener el mazal de konoser al Sinyor François Azar, ke es para mi, el muevo star de la lingua Judeo-Espanyola en Fransia. Reelmente los Sefardim de Fransia tenian de menester de un mansevo asemejante. El esta preparando livros para las kriaturas en judeo-espanyol/fransez i en judeo-espanyol/inglez. Vash a tener la posibilidad de topar estos livros en este diya. I vash a topar la posibilidad de oyir a François avlarmos sovre sus proyektos.
Todos konosen a las tres dammas Süzet Herman, Anna Eskenazi i Karen Şarhon ke azen kada anyo una parodiya ke es apresiada por los invitados. Este anyo Şeli Gaon esta tomando el lugar de Karen. I kreo ke van a prezentar otra maraviya.
El anyo pasado era Meir de Robelyu ke mos aparejo un pranso reelmente muy reushido i servido kaynte para mas de 250 personas. No es kolay de sirvir una komida kaynte para 400 personas. Ma lo vamos a reushir.
Kreo ke vos va plazer las avas kon espinaka, el prasifuchi, las bulemas de berendjena mizmo las koftikas de patata. Ay muy poka djente ke no komen la semola (irmik tatlısı).
Todos estan koryendo para segir los konsyertos del kantador Cenk Rofe. Esta vez mos va kantar en Djudesmo. En este diya vash a topar la oportunidad de oyir este kantador.
Kada anyo kuando los artistos de la “Kula” toman shena, toda la djente koryen para ver lo ke se esta djugando. Esta vez vash a pueder segir una pyesa ke asemeja el “Hababam Sınıfı”. Reelmente este teatro fue realizado kon el koraje de Forti Barokas. No se ken djuga! No se ken ay! Ma ya se ke estan dando un grande esforso para realizar esta reprezentasyon.
Esto es una okazyon para pueder partisipar a un diya ande se kanta, se avla i se oye esta lingua. Vos estamos asperando kon impasiensia!
