Los Gabayes Diplomados

Silvyo OVADYA Köşe Yazısı
10 Ekim 2018 Çarşamba

Anyos antes kuando era prezidente de muestra komunidad, muestro amigo Robert Abudara, ke su alma repoze en Gan Eden, me disho ke es muy emportante para el futuro de muestra komunidad de organizar un kurso para edukar siertos mansevos para tener muevos hazanes. I este kurso se realizo kon grande reushitad. Ma los diplomados en kurto tyempo preferaron a lavorar en otros echos o de irsen a Israel. Mizmo les pagimos para ke vyenen i se ambezan komo un hazan deve de komportarse, ke deve de azer en la keila i un alay de kozas. Los primeros anyos todos los ke partisipavan a estos kursos eran embiyados a diferentes sinagogas para tomar lugar en la teva. Kreo ke oy en diya el Kal de Caddebostan es el mas kapache para dar koraje a los mansevos. Dos semanas antes diya de shabat estava en la Sinagoga de Caddebostan i toda la tefilla fue egzekutada por tres mansevos.

Dos anyos antes, el sinyor Hayim Hason ke lavora en el Rabinato dyo karar kon la aprovasyon de la administrasyon de formar un kurso para los gabayes de las sinagogas. En Estanbol oy en diya temenos dainda 17 sinagogas ke lavoran a lo manko kada shabat (las tres solo en enverano) Neve Şalom, Ashkenazi, Italyano, el kal de Or Yom, Şişli 1, Şişli 2, Göktürk, Ortaköy, Yeniköy, Sirkeci, Balat, Hasköy, Caddebostan, Haydarpaşa, Kuzguncuk, Büyük Çorapçı Han (ke fonksyona solo los diyas de entre semana para shahrit i minha), i las keilas de las islas Büyükada, Heybeliada i Burgaz ke fonksyonan solo en enverano.

Entre los ke asistyeron a este kurso ke fue dado por los raves Adoni i Sevi solo los ke asistyeron mas de 80% tuvyeron el derecho de resivir un diploma. Esto felisitando los sinyores Selim Amon de Sirkeci; Vitali Pinto, Aron Hara de Kuzguncuk; Suat Haviyo, İzzet Yaeş de Ortaköy; Sedat Amon de Haydarpaşa; Albert Elnekave de Kemerburgaz; Yako Yeruşalmi, Moris Behar de Hasköy; Hayim Rozant, Sabetay Kamhi (z”l) de Burgaz; Sabetay Çukran de Balat i Hayim Hason.

Diya de shabat estava en Sirkeci para el limud de mi padre i el Gabay diplomado Amon estava orozo en kontandomos ke fue diplomado diya de myerkoles en una seduta del Gran Rabinato.

 

 

Siz de yorumunuzu yapın

Tüm Yorumları Görün