Ansi avlo el Kriyador a Moshe: Pinehas, ijo de Elazar, ijo de Aaron Akoen, izo tornar mi sanya, de los ijos de Israel Zelanda mi zelo entre eyos. I no konsumi a los ijos de Israel en mi zelo por tanto de mi firmamyento de paz. I tendra el, i su semen despues de el firmamyento de ke una para syempre.
Ansi enpesa la perasha de Pinehas. El puevlo judyo aserkandose a el Yarden pozaron en un lugar nombrado Shitim, los moavim vyendo ke los ijos de Israel no pensaron de gerear kon eyos, se aserkaron a los judyos. Sovre el konsejo de Bilam ke los dyo a saver, ke lo ke se puede venser a este puevlo judyo, es kuando reveyan i pasan el komando de el Kriyador. Izyeron todo su posivle por azer trazyerrar a las judyos i ke kovdisyaran en sus ijas i sus mujeres de los moarim. Malorozmente el puevlo judyo se desho venser de su negro apetite i se trazyerraron en este partikular. I no mankaron ke sivyeron i adoraron tambien a sus idolos, El Kriyador mando una mortaldad entre el puevlo i muryeron vente i kuatro mil personas. En el tyempo ke estava el puevlo atristado tuvo la ozadiya un syerto Zimri del trivo de Shimon, i tomo una ija de un grande personaje de Midyan i se la yevo kon un deskaramyento, delantre de Moshe i todo Israel, en la ora ke todos estavan yorando, ninguna no tuvyeron el koraje de azer nada a este akto. Un syerto personaje nombrado Pinehas, ijo de Elazar, ijo de Aaron Akoen zelo sovre esta desgrasya i mato kon una lansa i mato a Zimri i a Kozbi bat tsur. Grasyas a Pinehas ke al punto kedo la mortaldad. I el Kriyador la dyo renkonpensa a Pinehas. I lo desho bivir munchos anyos. I le dyo la keuna gedola a su semen.
