En la memoria del Sinyor Jak Strugo

Silvyo OVADYA Köşe Yazısı
23 Mayıs 2018 Çarşamba

Kuando estava estudyando en la Universitad Teknika d’Estanbol en los anyos 1974-75, en la universitad avian syertos movimyentos i munchos diyas no era posivle de segir los kursos ke se davan en la universitad. I me iva a la botika ande era patron mi padre kuando estava dainda en vida. La botika o büro se topava en el Çorapchı Han en Mahmutpaşa, el uniko han en el kuartier de Eminönü ande se topa una Sinagoga. I muestra botika ke la empleavamos komo un büro estava detras de la sinagoga. Aya dainda se aze las orasyones de la demanyana i la Minha. I kuando no aviya minyan, mos yamavan para kompletar el Minyan.

  Dos botikas al lado, avia un syerto Sinyor Leon. I tenia un amigo intimo ke era en mizmo tyempo el kontavle de la firma i viniya una o doz vezes a la semana. En esta epoka las formalidades ofisyales no eran tanto emportantes. Syertas botikas o lavoros (komersyo) eskriviyan los livros -defteres ofisyales - a la fin del anyo. Mismo si una partida de las vendidas eran kon eskrita (fatura), la otra partida era sin eskrita. No deviamos de dar kada mez un alay de manifestos (beyanname) komo oy. Oy kon los kompyuteres, los echos son mas seryozos. I kada firma deve de tener su kontavle o un ayudante kontavle. El Sinyor ke lavorava komo kontavle era el Sinyor Jak Strugo ke tuve anyos despues la posibilidad de konoser i de lavorar endjuntos.

  Es el diya de Shavuot o una noche antes ke mos desho la vida. Anyos antes, empeso a lavorar en primero en la Fondasion de Neve Şalom i despues los vente anyos de alkavo en el Gran Rabinato (en la Direksyon de muestra Komunidad). Reelmente Jak era un ombre muy onesto, muy yugozo; mizmo despues de sus ochenta, lavoro kon grande veluntad. Ay unos kuantos mezes, kreo ke era el mez de desembre ke el Prezidente de la Komunidad, el Sinyor İbrahimzadeh i los miembros organizaron una seremoniya en el Gran Rabinato antes de su “emeklilik” ande todos tuvimos la posibilidad de avlar unas kuantas palavras. Todos los ke tomaron la palavra era para alavar al Sinyor Jak Strugo. Kuando era prezidente de la Komunidad, avlavamos mizmo unas kuantas vezes al diya. Avlavamos komo se devia de gastar para siertas kozas. I lo mas emportante era de plasar las paras de la Komunidad para no pyedrer su valor. I Jak era reelmente muy atantivo en su echo i kreo ke izo todo su posivle para el bien de la Komunidad.

  Kuando esto eskrivyendo estos biervos los funerales no se realizaron dainda. Ma kreo ke Ceni, su mujer esta muy trista kon esta pyedrita reelmente emportante. Ke el Dyo le de pasensya a eya i a Jak: ke su alma repoze en Ganeden.