Los Amerikanos en Yerushalayim

Silvyo OVADYA Köşe Yazısı
16 Mayıs 2018 Çarşamba

Ay unas kuantas semanas ke estamos asperando este evenimyento muy emportante para el Estado Israelyano i para los Palestiyanos, mizmo para el Medyo -Oryente. Ya savemos ke ay anyos ke los Amerikanos dyeron karar para ke Yerushalayim sea el lugar ande va estar el embashada Amerikana. Esto deve dizir ke van achetar Yerushalayim komo la kapitala del Estado Israelyano. Ma esta ley deviya de ser afirmada por el Prezidente Amerikano. Antes de kada eleksyon vemos en las asosyasyones djudias ke los kandidatos vyenen a estas asosyasyones, mizmo si no tyenen bastante tyempo asistan kon tele konferensya a estas asambleas para dar sus ideas. I para dizir ke van achetar Yerushalayim komo la kapital del Estado Djudio. Fue en el anyo 2000 ke tuve la posibilidad de oyir dos kandidatos ke prometyeron esto. Fue por la segunda vez, ocho anyos despues ke tuve la posibilidad de oyerlos esta vez en una konferensia del AIPAC.

 Oy antes i dospues ke los Amerikanos transferaron sus embashada de Tel Aviv a Yerushalayim, en Gaza i Ramallah, vimos evenimyentos muy emportantes ande mas de sinkuenta Palestinyanos pyedreron sus vidas. Kualo es la razon? El estado Djudio empesando de diya de alhad les disho de vinir a la frontyera Israelyana. Ma izyeron el kontraryo i el rezultado fue problematika.

 Kale achetar ke Israel es un payis demokratiko i los ke keren pueden protestar las desizyones de los governos. Mizmo sovre un sujeto reelmente muy delikado komo lo ke bivimos oy, ay grupos Israelyanos en Israel, i grupos de Djudios en los Estados Unidos ke estan protestando la desizion del prezidente Trump.

 Todos saven ke Israel konkisto (fethetmek) Yerushalayim en el anyo 1967 i dyo karar ke Yerushalayim es la kapitala del estado en el anyo1980. Todos los ambasadores ke lavoran en Tel Aviv para kada randevu kon los responsavles del estado o para kada kontakto kon los politikos, deven de irsen a Yerushalayim. I dingunos no keren achetar esta realidad. Ya savemos ke Ehud Barak, primer ministro Israelyano avia prometido munchas kozas al lider Palestinyano Arafat para pueder azer paz. Ma Arafat no acheto esto por ke no puediya ser el lider de los Palestinyanos kon la situasyon de Paz. Ehud Barak prometyo tanto ke no fue elijido otra vez a un posto asemejante.

 Ya se ke empasando de la Turkiya syertos payizes estan kontra esta situasyon i el Estado Israelyano no esta puedyendo eksplikar o no topa el menester de eksplikar lo ke estan azyendo.

 Para eskapar kero partajar mis ideas kontra los ke embiyan mesajes en las medias elektronikas kontra la Turkiya i kontra la politika del governo Turko. Es djusto ke pueden tener ideas diferentes o kontraryas a lo ke pensan los diridjentes del Estado turko. Ma kreo ke no tyenen el derecho de azer kifures u bendisyones. No esto entendyendo de ke estan tanto enteresados kon sus payizes de orijin. Komo son agora Israelyanos no deven de enteresarsen tanto kon la politika de la Turkiya.