Diya de alhad aviya las eleksyones en Almanya. Durante las kampanyas realizadas antes las eleksyones un ayre kontra los imigrantes, kontra la Turkiya i las personas ke se okupan da la politika turka fueron kritikados de mala manera. I los diridjentes turkos – si tenian razon o no - empesaron a avlar kontra la Shansolye Merkel i siertos partidos ke eran kontra las personas de la politika turka. Mizmo el prezidente de la Republika Turka en un diskorso disho a los Turkos Almanes de no votar para Merkel ni para los vedres i para los ke son kontra una grande imigrasyon musulmana porke estan viendo ke no keren asimilarsen o bivir de la mizma manera ke los Alemanes. Este pleto fue un apoyo para el partido ekstremisto de la derecha, mizmo se esta avlando de un partido politiko un poko fashisto reusho a entrar en la asamblea kon serka de 13 por syen de votos. Esto se realizo en la Alemanya ke konosio el partido nasyonal sosyalisto en los anyos 1930 i 40. Oy en diya kon los problemes ke se biven en munchas partes del mundo, los ke no tienen la posibilidad de bivir en prosperidad (refah), keren imigrar a los payises evropeos. Mizmo si ay muncha djente ke topan siertas makulas a los payizes evropeos devemos de achetar ke de punto de vista “derechos umanos” i “ekonomika” los payizes evropeos son reelmente los preferavles en el mundo. Los estados dan todo modo de posibilidades a los estudyantes; todo modo de ayudo para los problemas de sanedad; dingunos avlan de los problemas kontra la djustisia. Porke no ay endjustisyas en el derecho. I esto es muy importante para las personas. En munchos payizes es djusto ke no keren achetar mas de unos kuantos imigrantes musulmanos porke tienen espanto del futuro. Es djusto, ke esto no kijo dizir ke los ke no son kristyanoz son danjerozos ma los anyos dalkavo malorozamente vimos munchos kavzos ande los teroristos eran muzulmanos i no de una otra relijion. Eran kompatriotos (vatandaş) del mizmo payiz ke atakaron. Mizmo izyeron sus estudios en este payis. I esto revelo (ortaya çıkarmak) un espanto en los sivdadinos de estos payizes. Kale achetar ke no puedemos klasifikar las personas sovre sus relijiones, o sovre sus orijen. Vimos munchas desgrasyas kuando la Yugoslavia se despedaso. I los ombres ke asasinaron miles i miles de ombres, mujeres i kriaturas no eran muzulmanos. Malorozamente mizmo en el ventiunien siglo estamos bivyendo munchos problemas de rasizmo ke reelmente es inachetavle (kabul edilemez).
Lunes avia un referandum en el norte del Irak. Los Kurdes ke biven en esta rejion malgrado ke fueron menasados por los payizes ke se topan en la rejion, el Prezidente de sus rejion, el sinyor Barzani no troko su desizion i realizo este referandum fin a la fin. Es djusto ke los Kurdes no biven solo en esta parte de Irak i biven en el norte de la Siria; en una parte de la Persia i kale achetar mizmo una partida en muestro payiz en Turkiya. I este referandum organizado por el prezidente de la rejion del norte del Irak, Barzani, kreo ke es solo un empesijo para la fondasyon de un estado Kurdo. Es djusto ke esta rejion tiene de menester de muestro payis: la Turkiya. Porke son ovligados de vender el petrol sovre la Turkiya porke esta partida del payis no se topa al lado de la mar. I la Turkiya es el mas grande merkador del petrol produisido en esta rejion. No se si es vedra, ma los diyas dalkavo empesaron a eskrivir siertas novedades sovre el ayudo de Israel a los Kurdes para ke estableskan un estado. Este modo de haberes es la razon de una mueva ola (dalga) de antisemitizmo. Durante anyos se avlo en la media ke Barzani era djudio. De ke? Porke en Israel se topan siertas famiyas orijinaryas de Irak i ke tyenen la alkunya Barzani. Puede aver siertas famiyas de orijin Kurdo ke tyenen esta alkunya ma esto no es una razon para determinar la relijion del diridjente Barzani. Vemos en Fransia djudios ke tyenen un nombre de famiya franseza pura. I mizmo en los Estados Unidos ay munchos djudios ke tyenen nombres de famiya ke parese a los de los WASP (White, Anglosaxon, Protestant) amerikanos. Mizmo en muestro payis tenemos siertas famiyas ke tienen nombre de famiyas turkas (komo Öztürkkan) esto no kijo dizir si ay un turko muzulmano ke tiene la mizma alkunya deve de ser Djudio/dia.
Kreo ke a la fin del referandum van a tener un rezultado pozitivo para un Estado ma no lo van a deklarar. Van a ser mas poderozos en las diskusyones politikas. El primer ministro Turko disho ke van a serrar las frontyeras. Ma reelmente es muy difisil para la Turkiya i para esta rejion. El sigundo payis emportante para la Turkiya es el Irak i lo mas muncho se vende a esta rejion ke es muy rika. I la Turkiya es el merkador el mas emportante del petrol ke produsen. I dospues de los problemes ke estamos bivyendo kon la Alemanya, el mas grande merkador de la Turkiya, tener un otro problem kon el segundo no es muy simpatiko.
Espero ke los politikos van a ser mas rezonavles para ke no bivimos importantes problemes en muestra rejion.
