La Natura (tabiat) troko de kolor este enverano

Silvyo OVADYA Köşe Yazısı
9 Ağustos 2017 Çarşamba

Ay dos semanas ke esto leshos de los lektores del Şalom. Es djusto ke eskrivi por el Amaneser ma el Şalom es otra koza.

 En las tres semanas dalkavo, muestra sivdad Estanbol mizmo muestro pais bivio unas kuantas desgrasyas. Bivimos un rash (tremblamento de tierra)-esto siguro de este biervo porke izimos estudios en el grupo de whatsapp del sentro por el “deprem” - bastante fuerte en Bodrum. Unos kuantos diyas despues una de las mas fuertes luvyas de los sinkuenta anyos dalkavo ke duro una ora mizmo dos oras dio grande danyo a las kayes i a las kazas. Una semana, dyes diyas antes, djugeves a la tadre una tempesta, un pedrisko. Vos puedo dizir ke en el lugar ke estava, el pedrisko estava komo guevos. Estava en una reunion en un otel de sinko estreyas i despues de la tempesta, luvya, pedrisko todo modo de aguas en la entrada del otel. El ombre kon ken estavamos avlando resivio un telefon del kondüktör – el shofor de la araba dizyendo ke el djam de la araba se rompio i el patron le disho vate al garaj ke se topa debasho del otel. A la salida vemos la BMW mueva kon el djam roto i dizenas de foyos en kada lugar de la araba. Dos diyas despues le demandi kualo izo i me disho ke los servises estan achetando reparasyones para tres semanas despues porke estan yenos a patladear. Despues de una semana disheron ke el danyo materyal era muy grande i las kompanyias de seguridad estan pasando diyas muy difisiles.

 Si estash en el internet vash a ver ke se esta vendyendo apareyes ke los yaman “Bezos de amor” (Aşk öpücüğü). Puedeser es la primera vez ke estash sintiendo este nombre. Es un aparey ke syerve a reparar (tamir etmek) los foyos ke se formaron ensima de la araba. Kuatro anyos antes kuando se formo un foyo en la araba miya me embiyaron en un lugar ke aze solo esto kon el aparey: Bezos de amor.

Una semana despues, estos diyas dalkavo, esta vez es la umidita (rutubet) ke mos esta matando. Kon sesenta por syen de umidita es muy yuch de tomar reflo. Mizmo en la Ada no tenemos soplo. I es en estos diyas ke empesimos a emplear el ayre kondisyonado (air condition) mizmo en la Ada. A ken le vinia al tino vente anyos antes de emplear ayre kondisyonado.

 En estos diyas era i tisha beav. Kada anyo es uno de los mas kalorozos diyas del enverano. I munchos djudios komo azen Tanid no es muy kolay. Despues de Tisha Beav en la Ada es un shabat de fiesta. Porke el Hashambashi viene a la Büyükada diya ve viernes i se keda tres diyas. Diya de Shabat kuando vyene al kal de la Ada, el mayor i todas las personas ke son responsavles en diferentes postos (makam), mizmo los prezidentes de los Klubes sosyales ke tyenen miembros de muestra kolektividad vienen al kal verso la fin de la orasyon i despues tomamos lugar en la mizma meza de la Seuda. Los yahides son kontentes de resivir al Hahambashi Haleva kada anyo el shabat despues de Tisha Beav.

Este anyo malorozamente por la primera vez no pude irme a este shabat a la Keila porke para mi teniya un dover mas emportante. Mi ija i mi inyeta ke biven en la Inglatiera vinyeron para kinze diyas en este mizmo diya. Ke koensidensya ke el mizmo diya mi ijo estava tornando de las Amerikas ande paso un mez en la Universidad de Boston. Ya savesh ke oy en diya los paryentes azen lo ke pueden para ke sus kreaturas tomen la mijor edukasyon. En las islas, el mez de Agosto va ser mas yeno de djente. Una partida de los mansevos tornaron de todo modo de kampos d’enverano. I otra moda una partida de las famiyas estan pasando un mez en Çeşme o Bodrum i en el mez de Agosto estan tornando a las Islas.