“Kol a koes hohmato mistaleket mimenu.” - “Del ke se ensonya, su sensya se le resfuye de el.”
En la perasha de Matot meldamos este kapitolo: “I Elazar Akoen disho a los varones del fonsado ke se avian ido a la gerra, esto es el fuero de la ley ke El kriyador enkomendo a Moshe”.
En el Talmud dize: Rish Lakish, un Rabino renomado de el Talmud, trae a la konosensya dizyendo: “todo ombre ke se ensanya, si es savyo, piedre su sensya, si es profeta, piedre su profetizya. Si es savyo piedre su sensya, no lo embezamos de Moshe Rabenu, i Moshe se ensanyo kontra los komandantes del fonsado los mayorales de miles, i los mayorales de syentos ke vinian de la gera.” Despues de este pasaje vemos en la perasha ke la palavra tomo Elazar Akoen por kavza ke en akel momento ke se ensanyo Moshe Rabenu perdyo Moshe Rabenu su sensya i no tuvo la fuersa de avlar.
Puedemos imajinar, en el real ke se topava seshentos mil ijos de Israel, todos perades delantre de Moshe Rabenu, esperando ke Moshe Rabenu va tomar la palavra, i les va enbezar syertos preseptos de la ley, sintyedo la boz de Elazar Akoen se demandaron de unos a los otros por ke no avlo Moshe Rabenu?
Nos enbezamos de este kavzo: la persona se da a la pena por deprender la sensya, en la ora de su sanya piedre todo lo ke se enbezo.
La persona ke tira la ravya, i la sanya de su korason adova todos sus mankuras.
El Rabino Rabi Hayim Vital diziya, la ravya es el pekado grande ke puede kometer la persona. Tanto ke se aravya o se ensanya en kestion de mitsva, tanto ke se ensanya en enbezando a sus ijos o elevos, la ravya es ravya, i es una kulpa ke komete. Los yerros i las kulpas la persona komete a azerlos kon uno de sus myembros de su kuerpo, ma la ravya danya su alma de la persona, i aze terefa a su korason.
El Rabino Rabi Yosef Karo ke eskrivyo el uvraje Shulhan Aruh, se le aparesiya un malah (andjelo) nombrado MAGID ke le deskuvriya los sekretos de la Tora, i lo aziya andar en kamino de Dyos. A este nombre del malah, eskrivyo el Rabino Yosef Karo un livro nombrado MAGID YESHARIM. En este livro dize el Rabino, de ser la persona syempre umilde, i no aravyarse por ninguna koza, no ensonyarse del todo. Tambien tira la atansyon dizyendo, aleshate de la ravya i la sanya, malgrado ke te izyeron aravyar i ensanyarte. La sensya ke tu saves enbezala a todos. Finalmente los konsejos ke da a el ombre es de konportar kon la djente kon repozo, de no ser apresurozo por aravyar. Esto es lo ke demanda El Kriyador, la Tora, i la konsensya de nozotros.
MASE
Estas son las movidas de los ijos de Israel, ke salyeron de la tyerra de Ayifto, por mano de Moshe i Aaron. I Moshe eskrivyo sus salidas sigun sus movidas por dicho del Dyo.
Moshe Rabenu sovre el orden del Kriyador, eskrivyo los nombres de kuarenta i dos lugares ke pasaron los ijos de Israel en el dizyerto. El eskopo de mansyonar los nombres de estos lugares fue por ke sepan las jenerasyones vinederas las maraviyas ke izo El Kriyador a nuestros padres en los kuarenta anyos ke estuvyeron en el dizyerto. Komo eskrive en la Tora, El Kriyador no te afriyo, te arto, te izo komer pan, tu vistido no se envejesyo de sovre ti.
En el Midrash Tanhuma dize; i una razon ke konta en la perasha de Mase estos kuarenta i dos lugares ke estuvo el puevlo Djudyo es por dar merito a estos lugares ke abrigaron a los ijos de Israel. I la leson ke se puede kitar de este pasaje es un dizyerto ke abrigo a la djente tuvo merito del Dyo, si una persona abriga i arta a los menesterozos no kere dicho ke grande merito tyene verso El Kriyador.
Los nombres de los lugares ke pasaron los ijos de Israel fueron dados sigun los pasajes ke afitaron ayi ‘Kivrot Ataava’, el lugar onde enteraron sus dezeos, ‘Mara’ onde bevyeron aguas amargas i se adulso El Kriyador mezo Moshe Rabenu. Dishites a tu granpapa ke estudijimos asta la manyana. Le responde dizyendo: “Onde puediamos topar la okasyon de sintir este valutozo kastigeryo?”. Ansi los trivos ke no kijeron entrar a la tyerra de Kenan no respondyeron a Moshe Rabenu i sintyeron el buen doktrino. Komo dize Shelomo Ameleh en el livro de Mishle: “Ombre savyo estima el doktrino”.
