Las aktividades Kulturales, muzikales i artistikas en la Komunidad Djudia de Fransia

Silvyo OVADYA Köşe Yazısı
14 Haziran 2017 Çarşamba

La semana pasada estuve solo dos dias en Paris, en Fransia. De vez en kuando me vo para vijitar unos kuantos klientes. Ay un anyo ke los industriales i los komersantes ne keren mas vinir a Estanbol i no se si es el terorizmo ya lo topamos i en munchas sivdades de la Evropa o si es el manko de demokrasiya no los enteresa. Si no van azer manifestasyones dingunos no los va tokar. I este modo mozotros industriyales turkos empesimos de muevo a viyajar kon una validja de eshantiyones de muestra produksyon. I este modo estamos aziendo esforsos para el provecho (fayda) de muestro echo.

  I myerkoles el 7 de junio kije vijitar a François Azar ke es una persona reelmente muy emportante para la Kultura Sefardi. El anyo pasado vino a Estanbol i tuve el plazer de konoserlo. Malorozamente torno el 16 de Julyo, a la demanyana de la tentativa de una revolusyon. Kon trenta kilos de livros ke mos tomo fue ovligado de kaminar un kilometro para alkansar el aeroporto. Avia munchos aviones ke no puedieron bolar ma François alkanso a tomar un buen vuelo (uçuş).

  Kuando alkansi a su kaza-ofisio me dio haber ke esta semana devian de prezentar el livro muevo ke publikaron. Ke es este livro? Eskrito en fransez por Sandra Albukrek – ija de los medikos Lydia i Musa Albukrek – ke bive en Fransia, “Un des murs de ma cuisine est couleur cannelle” (Una de la las paredes de mi kozina es kolor de kanela (tarçın)”. Es un livro de ochenta i sinko ojas kompozado de poezias ande trata de la kozina ke konosio en su chikes en Estanbol i de la kozina ke konosio en Paris komo adulta manseva. Le demandi lo ke van azer para ke la djente konoska este livro? Me disho ke empesando de oy (el 6 de junio) fina el 26 de este mez, la Komunidad Djudia de Fransia esta organizando el Festival de la Kultura Djudia. I le demandi kualo son las aktividades. Me dyo un livro ande ay un alay de aktividades. Le demandi kualo avia akeya mizma noche. Me disho ke estava envitado a dos aktividades la mizma noche. Tenia de irse al Konserto del Pianisto Michel Legrand, muy renomado de Fransia. El es kompozitor, kantador, pianisto al grado de virtuoz; produktor i es renomado por las muzikas ke kompozo para los filmos : “Les Parapluies de Cherbourg” (1964), “Les Demoiselles de Rochefort” (1967), “Yentl” (1983) kon Barbara Streisand… i el otro era un bale de la kompanyia Batsheva en el Palasyo Chaillot ke es un Teatro Nasyonal de Bayles. I yo me fui al Palasyo de Chaillot. Un salon muy ermozo kon kreo mas de mil fotolyos, mizmo dos mil. Era una envitasyon ma no debaldes; pagi las paras ma estava en el treser rango. No se si era un balet ma era un bayle moderno. Kreo ke el koreograf Ohad Naharin es muy famozo. El nombre del balet era “Last Work”.

   Vos avli de la prezentasyon del livro de Sandra Albukrek. I en primero fue prezentado en el “Salon du Livre du Mémorial de la Shoah” entre el 8 i el 11 de junio. Dospues va ser prezentado los diyas ke se van a realizar aktividades sefardis. Reelmente tienen la posibilidad de azer aktivitades anchas (ke munchas personas pueden vijitar). Kualos son las aktividades sefardis? “Ensemble Bilbilikos: Sultana, Luna y Esther” ke es un konserto en el Sentro Cervantes el 14 de julio, el filmo “Las Ultimas Palavras” de Rita Ender el mizmo diya, “Voyage dans le monde de la musique judeo-maghrébine” el 16 de julio. Todo no es esto. Ay un alay de konsyertos, ekspozisyones i konferensyas durante venta i un diya. La proksima semana vos va kontar sovre las otras aktivitades de este Festival.