Matilda Koen Sarano i sus kuentos

Silvyo OVADYA Köşe Yazısı
26 Ekim 2016 Çarşamba

Es trenta anyos antes ke por la primera vez tuve el plazer de konoser la Sinyora Matilda Koen-Sarano kon su livro (kreo ke es el primer) “Kuentos del Folklor de la Famiya Djudeo-Espanyola”. Era por la primera vez ke tuve la posibilidad de meldar munchos kuentos i la mas grande partida kontados por su padre i por su madre. Matilda Koen-Sarano es una eskrivana muy onesta i dospues de kada kuento da su orijen; i por ken fue kontado este kuento. Reelmente esto es muy emportante por la onor de la eskrivana. Es por esta razon ke kreo ke todos tuviyeron konfiensia en Matilda i reusho de publikar un alay de livros sovre los kuentos de muestra kultura.

Kuentos sovre el Folklor, Kuentos sovre la Famiya, Kuentos sovre Djoha, Konsejas i Konsejikas del mundo Djudeo-Espanyol, Kuentos de todos los tiempos, Lejendas, El kurtijo Enkantado son los titolos de siertos livros publikados de Matilda Koen-Sarano.

Estos livros kreo ke son uno de los materiales ideales para azer ambezar esta lingua. I reelmente es el espejo de muestra kultura kon sus konsekuensas, kon sus lisyones moral, kon su saveduria...

Si keresh merkar estos livros malorozamente la mas grande partida  no se topan mas porke se eskaparon i la kaza de edisyon kreo ke no kere publikar una segunda o tresera vez estos livros. Ma muestro dover es de propajar este modo de livros.

Muestra amiga Karen kon su amistad kon la Sinyora Sarano mos dyo la posibilidad de publikar estos livros i se metieron de akordo para publikarlos (no todos, ma los ke se eskaparon) por la segunda o tresera vez. Puedesh demandar si no ay otros livros ke puedesh publikar? Si, puedemos publikar otros livros ma kale achetar ke todo modo de persona no tiene la mizma posibilidad i la mizma kapachedad ke Matilda Koen-Sarano tiene. 

Oy en dia tenemos dainda personas ke pueden avlar, meldar i eskrivir en muestra lingua ma malorozamenta el Judeo-Espanyol no es la lingua maternal (la primera lingua ke se ambezaron i ke avlaron) de estas personas, ma kreo ke no es la mizma koza para Matilda.

Orijinarya de la Italia, paso a lo manko trenta anyos de su vida para pueder publikar este trezoro, este trezoro sefaradi …

Muestro Sentro de Investigasyones sovre la Kultura Sefardi va publikar el primer de estos livros en el mez de novembre. Si mos dash koraje, vash a tener la posibilidad de ver una grande partida de estas publikasyones.