Alhad de manyana, treser dia del mes de djulyo, en kaji la totalidad de la Prensa Evropea i tambyen Amerikana, el mizmo titolo de diferentes artikolos anunsyando la muerte del eskritor i filozofo djudyo amerikano “Elie Wiesel”, loreato del Premyo Nobel de la Paz del anyo1986 por su aksyon en favor de las viktimas de la violensa rasyal.
Si, Shabad el doz djulyo del anyo 2016 Elie Wiesel reskapado mirakulozo de la Shoah serro sus ojos a un mundo al kual el se esforso de dar en sus livros : no solo tekstos eskritos sovre ojas vazias, ma tekstos ke a eyos solos fueron aktos de reminisensya i de fidelidad al rekuerdo de la sufriensa de todos los ke muryeron en los kampos de konsentrasyon , aktos tambyen de revolta kontra una fatalidad indjusta i syega i sovre todo aktos de vijilensya afin ke mas nunka el mizmo drama no se repete.
En uno de sus tekstos, Elie Wiesel avia eskrito: “Si mos sometemos al olvido, mos sometemos a la negasyon de la Historya”.
Shabat a la noche, el primer ministro İsraelyano Binyamin Netanyahu izo el olojyo de Elie Wiesel i lo konsidero komo un rayo de luz en la obskuridad de la Shoah.
Segun el prezidente İsraelyano Reuven Rivlin : Elie Wiesel fue un heroe del puevlo djudyo i tambyen de la humanidad. El lo konsidero komo uno de los mas grandes ijos del djudaizmo ke mos ayudo a kreer en la fuersa del Perdon i de la Vida.
Kuando anunsyaron la triste novedad al prezidente de los Estados Unidos Barack Obama, el disho. ’Elie Wiesel fue la konsyensya del mundo i un egzempyo para la humanidad de nunka ser de parte de la indjustisya, ni indiferente a la sufriensa de los otros.
En un komunikado espesyal a este mizmo sujeto, el Prezidente de la Republika Franseza ‘François Hollande’ saludo Elie Wiesel komo un grande testigo del Venten siglo. El disho:“El, ke nasyo en una famiya djudia de Rumania, fue a la edad de kinze anyos deportado kon sus paryentes en el inferno de los kampos de eksterminasyon ande la muerte era kontinualmente prezente i la ambre tiranika. El fue un militante de la memorya i kedara syempre una figura emblematika del rekuerdo dolorozo de la Shoah i de la sufriensa de los djudyos’’ .
En efekto, no se puede nyegar ke Elie Wiesel fue la persona ke rezistyo lo mas al olvido i es ansi ke en munchos diaryos i hebdomaderyos evropeos i amerikanos, el mizmo teksto fue publikado kon palavras puede ser diferentes .
En su artikolo entitolado “Elie Wiesel, militante de la memorya” Paul-François Paoli mos dize lo sigyente: ‘Abundantemente traduzida i komentada, su ovra puede ser konsiderada komo una meditasyon en mizmo tyempo simple i profunda sovre ‘el mal’ i ‘ la responsavilidad humana’ .
İ, komo lo meldi, ‘militante infatigavle de los Derechos del Ombre’ Elie Wiesel refuzo syempre de una manera kategorika la indiferensya i utilizo su notoryedad para atirar la atensyon sovre ‘la violasyon de la libertad’ en ke lugar ke fuera. El avlo simultaneamente en favor de los djudyos sovietikos komo tambyen en favor de los indianos del Nikaragua o de los refujyados Kambodjianos, ansi ke de las viktimas de la gerra del Darfour en el Sudan.
Ay de esto unos kuantos anyos, en repuesta a la pregunta de un gazetero: ’Para vozotros kuala es la kestyon dominante de vuestra ovra ?’’ Elie Wiesel respondyo: Mi kestyon dominante es ‘Deke el mundo de oy es el mizmo del ke era?. En 1945 despues la desgrasya de Auschwitz, paradoksalmente yo era muy optimisto por el futuro i pensava ke el mundo ya se avia ambezado a luchar kontra el fanatizmo i ke ansi iva trokar… mi vida entera fue la mizmo interrogasyon ‘’deke el ombre no se ambezo i kedo el mizmo?‘
A notar keridos lektores ke Elie Wiesel refuzo la palavra ‘Holokosto’ ke el djuzgo absolutamente inadekuada i prefero el termo ‘ Shoah’ o byen ‘Auschwitz’. El syempre se engancho intensivemente a sus rekuerdos dolorozos en el eskopo de transmeterlos en sus integralidad, i esto afin ke ’Auchswitz nunka mas se repete’….
Esto dicho, me syento ovligada de eskrivir ke Elie Wiesel no tuvo unikamente admiradores, ma tambyen (kon grande frekuensa) kontestadores ke munchas vezes le reprosharon de no ser syempre fidel a la realidad . Uvo mizmo personas ke lo akuzaron de aver rovado el shifro de matrikula de un otro prizyonero... De su parte el sineasto ‘Claude Lanzman’ le reprosho su indiferensya por el filmo ‘La Shoah’ ke realmente es una ‘ovra maestra’ . Uvo mizmo varyos de sus korelijyonaryos ke lo akulparon de aver akseptado la okupasyon İsraelyana de la Sisjordania i la persistensya a syempre azer konstruir aya muevas fraguas; i lo ke es realmente muy triste Norman Finkelstein lo akuzo de instrumentalizar la Shoah en el buto de defender la politika Israelyana.
Ken tyene razon ? son raros los ke puedran responder sinseramente a esta pregunta…Personalmente no se si todas las kulpabilizasyones son verdaderas o no, ken es perfekto en este mundo ? En todo kavzo despues el singular silensyo ke avia sigido la fin de la segunda gerra mundyal, Elie Wiesel fue uno de los primeros ke avlaron kon tanta insistensya de la terrivle sufriensa ke fue la de muestros ermanos ke muryeron en la Shoah.
Ke su alma repoze en paz, i su nombre kede syempre gravado en la memorya de la mas parte de humanos, djudyos o no djudyos. Amen!
