Naso

Rav Yeuda ADONİ Köşe Yazısı
15 Haziran 2016 Çarşamba

En la bendisyon ke nos bendizen los Koanim egziste sej bendisyones. Ad…. Te bendiga i te guadre.  Aga alumbrar Ad.. Su kara sovre ti i te engrasye. Alse Ad… Su kara a ti, i poze en ti pas.

El Koen ke se topa serka EL Kriyador, por kavza de su misyon ke es de ayegar sirvisyos (korbanot) siguramente ke son resividas las bendisyones ke eyos nos bendizen. Komo es dicho, persona ke es ojo arto es bendicho, tambien sus bendisyones son resividos.

En el Talmud es dicho los malahim (anjeles) le disheron a El Sinyor de el Mundo: “En la ley ke dates a el puevlo Djudyo eskrive ‘Por ke Ad.. vuestro Dyo es Dyo de los dyozes, i sinyor de los sinyores Dyo grande poderozo i terivle, ke no resive fases. Komo eskrivites en la bendisyon de los Koanim Alse Ad.. sus fases a ti?”

El Kriyador responde dizyendo “Komo ke no alse mis fases sovre el puevlo Djudyo? Yo les enkomendi dizyendo vas a komer i te vas a artar i vas a bendizir a tu Dyo. Ma mi puevlo malgrado ke komen kantidad de una azetuna eyos no mankan de dizir Birkat Amazon (la beraha de despues de komer)”

No ay mas grande kualidad en la persona de ser ojo arto ke esparte de lo bueno ke le dyo El Kriyador, a los ke poko tyenen. Ansi los Koanim ke bendizen de la bendisyon ke les dyo El Kriyador a el puevlo Djudyo.

En la bendisyon ke nos bendizen los Koanim, nozotros, prononsas dizyendo te bendiza El Kriyador i te guadre.

El Kriyador bendize a los ombres, a ken le da sensya, a ken rikeza. El savyo tyene un entronpeso de tomarse gaava(grandeza) por su sensya. El riko tyene myedo de pyedrer su rikeza. Ma El Sinyor de el Mundo no basta ke le da a la persona su bendisyon i lo guatra de toda manera de entronpesos.

Despues ke meldamos en la perasha las bendisyones ke nos bendizen los Koanim, para ke seyan resividas enfrente El Kriyador devemos ser prontos a resivir estas bendisyones sigun la enportansa ke damos a estas bendisyones El Kriyador nos da a abondansa nuestros dezeos. Nuestros savyos los bendisyones las asemejan a un riyo, el riyo onde topa syempre manadero de aguas.