La Konstruksion de la primera ‘Kaza de Uno’ en Alemania

Dora NİYEGO Judeo-Espanyol
15 Haziran 2016 Çarşamba

La idea de konstruir una struktura relijioza, ande va aver tres salas de orasion para las tres relijiones monoteistas, fue propozada por la primera vez, antes diez anyos. En el anyo 2012, se aparejo una kompetision enternasional de arshitektura, para topar el mijor projekto para la konstruksion. La firma de arshitektura, Kuehn Malvezzi de Berlín, gano la kompetision.

El edifisio no va a ser grande, i la konstruksion va empesar en el anyo 2017. Mezmo ke la populasion de los Judios en Berlín es poka, komparando a la populasion de los muzulmanes i kristianos, las salas de orasion de las tres relijiones vana ser de mezmas dimansiones. La sinagoga va ser konstruida en una forma heksagonal. No va aver dingun elemento relijiozo en el eksterior del edifisio.

El projekto esta finansado kon donasiones via el web. Rabino Tovia Ben Chorin, uno de los lideres del projekto, esta diziendo ke ‘la Kaza de Uno’ va ser konstruida en Berlin porke esta sivdad es multikultural. Tambien es un lugar ande las diferentes kulturas pueden ambezarsen munchas kozas de unos a los otros.

Seminarios i konversasiones kon lideres relijiozos, filozofes, i artistos esta kontinuando. El kontrasto  entre el eksterior i el enterior es entensional (kasti). Va ser una kaza dedikada a la orasion i a la enstruksion. Todos vana pueder toparsen en una sala santral komun, ke va ser un lugar de enstruksion. Ensi, en esta sala komun la djente de las tres relijiones vana kompartir sus saverisios, sus ideas, i ensi se vana aserkar de unos a los otros.

Los arshitektos preferaron de no utilizar minares, kampanas, o shadayes al eksterior, porke la entision de este projekto es diferente. La Kaza de Uno va ser el sembol de la unidad.

La kaza de uno va ser una kaza de orasion i  de enstruksion mezmo por las komunidades sekulares de la sivdad. Va ser un lugar publiko para la pratika relijioza, ensi por la enstruksion, i no va ser una atraksion turistika. Berlín es una sivdad sekular, ma en mezmo tiempo una sivdad relijioza. La vida relijioza judia empeso poko a poko a ogmantar de dia en dia despues de la Segunda Gerra Mondial. Tambien munchos muzulmanes vinieron de Anatolia para topar echos i enstalarsen en Berlín. Komo rezultado, diversas komunidades de las tres relijiones monoteistas biven oy en Berlín, ma ay muy poka relasion entre eyos, komo vida publika i pratikas relijiozas. La relijion, la kreensia, o la teolojia son temas ke estan empesando a djugar un muevo rolo en la produksion artistika, en los debates seriozos, i en las ekspozisiones de las grandes enstitusiones kulturales. La firma de arshitektura Kuehn esta diziendo ke un edifisio de este tipo, puede ser konstruido en Israel, tambien. En Yerushalaim, ande ay monumentos relijiozos de las tres reilijiones monoteistas, el konsepto de la kaza de uno va ser mas apropriado ke en kualsiker otro lugar en el mundo. Aya, un edifisio de este tipo va ser totalamente en su lugar. (yerinde olacak).