La muerte de uno de los mas presyozos myembros de muestra komunidad

Klara PERAHYA Judeo-Espanyol
1 Haziran 2016 Çarşamba

Syega i kruelmente indjusta,  la muerte golpeo fatalmente uno de los mas aktivos myembros de muestra kolektividad:

Sami Herman

El  muryo entornado del inmenso amor de su mujer i de sus ijos ansi ke de la profunda afeksyon de sus amigos, a la edad de aproksimativamente 65 anyos, despues  un largo periodo de kudyos intensivos en los mas selebres sentros medikales del mundo ke le akordaron unos kuantos anyos de remisyon.

Sami Herman fue desde su adolesensya un myembro syempre muy aktivo i muy regolar de muestra komunidad, i a periodes diferentes  prezidente briyante de la “Fakirleri Koruma Derneği”  i tambyen del “Konsilyo Laiko”  ke es la mas grande  Institusyon Djudia de muestra sivdad.

Sami Herman nunka manko de ser muy komprensive  i tolerante kon kualkyer persona. El syempre se esforso de entender el ‘otro ke si mizmo’ i nombrozas vezes de ayudar los ke se aserkavan de el para demandarle  konsejo o kualkyer otra koza. Munchas vezes kuando mos enkontravamos en la F.K.D, el me repetava estas sublimes palavras de Rabbi  Israel Salanter:”Los menesteres materyales de mi proksimo son menesteres espirituales para  mi”.

Si, el era la persona ke puedia realmente entender el senso profundo de esta dicha del grande relijyozo djudyo.

Ke su alma repoze en paz i Amen.

Toda muestra simpatia a su muy kerida mujer Süzet Herman i a sus ijos ansi ke amigos de los kualos partajamos la tristeza.