Homenaje de Barack Obama a la memorya de los ke muryeron en Hiroshima i Nagasaki

Klara PERAHYA Judeo-Espanyol
1 Haziran 2016 Çarşamba

Vyerrnes demanyana  27 del mez de Mayo 2016, setenta i un anyo despues la primera i unika utilizasyon de la bomba atomika sovre las sivdades japonezas  Hiroshima i Nagasaki, el aktual Prezidente en funksyon de los Estados Unidos “Barack Obama” realizo un djesto no solo diplomatiko, ma profundamente  sinyifikativo, empapado de humanizmo en direksyon de los inosentes ke muryeron o fueron feridos por la vida.

Fue una vijita doloroza ke por seguro figurara en la Historya no solo Amerikana o Japoneza  ma tambyen mundyal. Barack Obama no prezento ekskuzas ofisyales de parte de su governo por el akto mortifero de entonses; el simplemente manifesto sus propyos regretos i su profunda tristeza, tomando en sus brasos los raros sovrebivyentes ke entonses eran  provablemente ninyos o adolesentes ke pudyeron mirakulozamente salvar aun la gravidad del terrivle atake al kual eyos fueron konfrontados.

Si, esta vijita memoravle no fue un akto de arrepentimyento ofisyal, ma un simple akto humano de piadad de un ombre delantre otros ombres ke fueron  suplisyados.

Uvo por seguro antes del aktual prezidente amerikano, munchos otros ansyanos Kapos de los Estados Unidos  ke vijitaron estas 2 sivdades i se inkorvaron  delantre los monumentos mortuaryos,  ma  fue syempre despues el periodo de sus propya governansya . Barack Obama fue el uniko prezidente Amerikano en funksyon a aver ekspresado su propyo regreto durante su mandato .

En el diskorso ke el pronunsyo, el disho: “Ay de esto setenta i un anyo, la muerte kayo del Syelo; este dia el Mundo troko por syempre; esta bomba mostro ke la humanidad tyene el medyo de destruirse de eya para eya.

Por seguro, vos vash a demandar deke oy venimos aki a Hiroshima? Venimos aki para refleshir konsernando esta fuersa terrivle ke fue liberada en un tyempo pasado no muy leshano. Venimos aki para inkorvarmos delantre el rekuerdo de los ke pedrieron la vida; sus almas mos avlan, eyas mos demandan de mirar en la profundura de muestra konsyensya.

‘Progresos teknolojikos sin progresos ekivalentes de las İnstitusyones humanas’ pueden ser mortales para  mozotros mizmos. ‘La revolusyon sientifika ke mos konduzyo a la fisyon del Atomo, egzije tambyen una revolusyon moral”.

Barack Obama fue de todo tyempo muy kontraryo al sistema  nuklear i portanto el deklaro klaramente desde el empesijo de su vijita  ke  no se topava aya para pronunsyar kualkyer djuzgamyento sovre la dechizyon de su leshano predesesor Harry Truman. El disho “Es el rolo de los historyanos de formular kestyones. Ay mas de 7 anyos ke so prezidente i me ambezi ke munchas vezes un dirijente es ovligado de tomar desizyones muy difisiles, partikularmente en tyempo de gerra”

‘Esta vijita simbolika de un Prezidente Amerikano sovre la tyerra mizma de las dos sivdades viktimas’ impresyono muncho el puevlo komo tambyen los dirijentes de las dos partes del Oseano Pasifiko…”Esta vijita renforsara muncho el objektivo de un mundo enfin afrankado de armas nuklearyas” deklaro el primer Ministro Japones.

En efekto keridos lektores, desde un largo tyempo la sola egzistensya del peligro nuklear obskurese terrivlemente la vizyon de un mundo sometido munchas vezes a la voluntad  loka de kualkyer dirijente orgolyozo sin konsyensya ni eskrupulo.

Me akodro aver meldado ke, ay de esto mas o menos 100 anyos, el grande ombre de siensya Jean Rostand  (preveyendo el peligro ke puede reprezentar una evolusyon sientifika eksesivamente rapida) avia dicho “La Siensya devino muy fuerte para permeter ke no sea ovligatoryamente muy vertuoza”.

En la meskla munchas vezes inekstrikavle de luz i  tinyevlas ande mos topamos en este momento, i ande kaji todo lo ke mos entorna tyene no una sola facha ma dos fachas kontraryas la una a la otra,  ‘avlar de konsyensya i de moralidad’ devyene munchas vezes un elemento  de burla.

Son  muy raros los ke tyenen la fuersa de ir kontra este koryente negativo ke  devyene de mas a mas rezistyente, ma para los ke pudyeron guadrar sus lusides la sola koza importante es de no abandonar la lucha.