Grande artisto pintador, Marc Chagall es un poeta ke se eksprime por medyo de spiritualidad. Supo sedusir el mundo kon la konservasyon mirakuloza de su adultez i la nostaljiya de su chikez. Sus pinturas son limpidas, espontaneas i mistikas. La Biblia, la tradisyon Judiya i sus simbolos milenaryos son integrados intimamente a su mundo interior i biven en el i kon el.
La kalor umana domina sus ovras. Mos ofrese un ambyente leyendaryo, un universo ande sovrebolan novyos en el syelo. Los kavretikos baylan, el lion salta sin malisya, entre arvoles de fruta i flores briyantes. Se syerve de formas i kolores kon su abilidad absoluta.
Chagall demostra su amor por Israel kon sus aktos. En una de sus demonstrasyones, el artisto dize: “No tengo menester de onores – tengo menester del amor de mi puevlo.”
Las 12 ventanas de la Sinagoga del Sentro Medikal de la Hadassah, en la puerta de Yerushalayim a Ein Karem, son ornadas de vitrajes demonstrando las 12 tribus de Yisrael.
SU VİDA
Nasyo en 1887, en Rusya a Vitebsk, de una famiya de orijen judiya. A 8 anyos desido de ser pintador. Se empyego ande los grandes pintadores i lavoro kon eyos. Sus maestros vyendo su amor i talento por el Arte, le prokuraron una beka para ke pueda ir a Paris, Monparnasse, lo ke era de uzo para devenir un pintador reputado. Teniya una inspirasyon i un poder de kreasyon infatigavles. Desvelopo su stilo uniko ke kontribuyo tanto al Surrealizmo. Muryo en 1985, deshando ovras innumeravles, despues de lavorar durante ocho dekadas.
Puedemos ver sus ovras en los muzeos grandes, komo el Metropolitan Museum de New York, Guggenheim Museum, New York, Hermitage Museum, Saint Petersburg, Museum of Modern Art, New York, Fine Arts Museums of San Francisco,
Royal Academy of Arts, London, Tate Gallery, London, Tel Aviv Museum of Art o el Musée National Message Biblique Marc Chagall de Nice, i munchos mas.
