INDIVIDUO - YO - MOZOTROS - EYOS Birey - Ben - Biz - Onlar

Şeli GAON Judeo-Espanyol
9 Mart 2016 Çarşamba

Komo vamos a reushir a ser komo semos propyo a si? La repuesta es muy fasil, tambyen muy difisil.

Kale ke adjustemos kozas diferentes de aryento muestro korason, a todos las novedades, los echos ke azemos.

Esto; no es ideas ke vamos a kopyar de los otros i los vamos a aplikar. Deve de ser opinyones ke vamos a produizir (üretmek) kon muestros esforsos, propyos a mozotros.

Dizimos ke; “El umano es una bestya sosyal” (İnsan, sosyal bir hayvandır).

Lo emportante es; “ser mozotros sin peryer muestro karakter, lo ke semos…

Kada persona es responsable de su prosperitad (refah) i esto enaltese la prosperitad de la komunitad ke estamos bivyendo.

Muestro buto deve de ser; asegurar de una manera igual (eşit) la vida ekonomika i sosyal de los menesterozos, de los hazinos, de los mansevos sovre el punto de vista de estudyo, de los aedados solos ke no tyenen famiya, i de munchos otros kavzos…

Kale absolutamente protejar sus derechos para ke puedan bivir en un nivel (seviye) normal.

Nazım Hikmet el poeto famoso turko disho ke: “La Vida deve de ser komo un Arvole Uniko i Libero” (Yaşam; bir ağaç gibi tek ve hür olmalıdır).

Todos los ke keren dar un apoyo deven de ambezarsen a lavorar endjuntos, para pueder ambezar; la Unyon, la Solidaritad, para pueder developar muestros butos i pueder pujar i krear proyektos muevos. Kale kreer al nesesaryo de ser ‘Mozotros’. Kale desidar de ser mozotros en savyendo i en dezeando esta nosyon.

Topar solusyones a los problemes es produizir (üretmek). Kritikar es muy fasil.

Yo penso ke; “La Vida es; lo ke te vyene a la Kavesa kuando tu azes Planos.”

Esta filozofiya es una filozofiya djusta. Ma lo ke es mas ermozo; es saver partajar los puntos produktivos de muestra vida. Lo ke se krea mano kon mano, i lo ke se partaja entre todos, puede kreer a la fin la nosyon ‘Mozotros’.

Antes anyos se biviya en la mizma kaza madre, padre, ijos, ijas, granmamas, granpapas, ermanos toda la famiya endjuntos. Oy es el kontraryo.

• Oy; la intelijensya esta avansada; ma la konsensya (vicdan) se aminguo.

• El espasyo (uzay) se aserko ma el vizino se alesho.

• Los enstrumentos de la komünikasyon (iletişim araçları) pujo ma la afeksyon se aminguo.

• Las kuras pujaron i las hazinuras komo el kanser pujaron tambyen.

• La saveduria (bilgi) pujo ma la konfiensa (güven) se aminguo.

• La nosyon de ‘Yo’ (Ben) se engrandesyo, la nosyon de ‘Mozotros’ (Biz) se aminguo.

Entonses; una unitad (birim) mueva empeso a lavorar kon volontaryas en muestra komunitad. El nombre de esta organizasyon es: Day Care Center.

El buto de este proyekto es de koloriar (renklendirmek) la vida de los ke tyenen 65 anyos i mas aedados, pueder asegurarles de pasar tyempo leshos de sus kazas, de sus problemes de kada dia, pasar tyempo de buena umor (keyifli) para eyos mizmo. Es un program ke se esta organizando doz vezes a la semana en ‘Alef’ en la eskola djudia, volontaryas kon profesyonales estan arekojyendo 30-40 aedados kon arabas i les estan fasilitando la ida i vinida a sus kazas, organizando munchas aktivitades diferentes komo; iyir al sinema, a los muzeos, djugar kartikas, lavor de mano, lavoro de arte, komer midi todos entornados al bodre de una meza para ke les venga la gana de komer... Kreer una diferensya en sus vidas asoladas i monotones, para ke no se syentan abandonados, ke se ambezen i ke se divertisen (eğlenmek).

Ay dos mezes de este proyekto ke todos los partisipantes estan muy kontentes.

Tanto ke estan asperando kon grande ahadut estos dias yenos de divertisimyentos.

Felisitasyones a los ke estan organizando, a los ke estan lavorando de alma i korason para alegrar i para ke pasen un tyempo agradavle.

Para pueder realizar estas novedades kale dar un apoyo; porke mano kon mano no es dos manos ma kuatro manos i se puede krear munchos proyektos para todos mozotros…